अमेरिकाले फाइजर र बायोएनटेकसँग गर्यो १० करोड डोज कोरोनाबिरुद्धको भ्याक्सिन बुक
प्रकाशित मिति : श्रावण ७, २०७७ बुधबार
अमेरिकाले कोरोनाबिरुद्ध भ्याक्सिन बनाइरहेका कम्पनीहरु फाइजर र बायोएनटेकसँग १० करोड डोज भ्याक्सिन बुक गरेको छ । यदि ती कम्पनीहरुले उत्पादन गरेका भ्याक्सिनहरु सफल भएमा सुरुमा नै अमेरिकाले १० करोड डोज प्राप्त गर्नेछ, त्यसबापत अमेरिकाले १ दशमलव ९५ बिलियन डलर तिर्ने सहमति जनाएको छ ।
कोरोनाभाइरस भ्याक्सिनको परीक्षण चलिरहँदा सरकार र भ्याक्सिन परीक्षण गरिरहेका कम्पनीबीच भएको यो सबैभन्दा ठूलो मध्येको सहमति हो । सहमति अनुशार अमेरिकाले थप ५ सय मिलियन अतिरिक्त डोज समेत ती कम्पनीसँग किन्न सक्नेछ ।
तेश्रो चरणका परीक्षण सफल भएर भ्याक्सिन प्रभावकारी र सुरक्षित रहेको प्रमाणित हुनासाथ फाइजरले सरकारको निर्देशनमा अमेरिकाका विभिन्न स्थानमा भ्याक्सिन डेलिभरी सुरु गर्नेछ । त्यसपछि उक्त भ्याक्सिन अमेरिकनहरुलाई निशुल्क उपलब्ध गराइने अमेरिकी सरकारको डिपार्टमेन्ट अफ हेल्थ एण्ड ह्युमन सर्भिसेजले जनाएको छ ।
फाइजर कम्पनीले यसअगाडि यसैमहिनाको अन्त्यसम्ममा थप ३० हजारलाई भ्याक्सिन दिएर वृहत परीक्षण सुरु गर्ने बताएको थियो । ती कम्पनीहरुले यसैमहिना भ्याक्सिन परीक्षणको प्रारम्भिक नतिजा सार्वजनिक गरेका थिए, जुन निकै सकारात्मक र उत्साहजनक थियो । सबैभन्दा अगाडि रहेका ४ वटा सम्भावित भ्याक्सिनहरुमा बायोएनटेक र फाइजरले परीक्षण गरिरहेको भ्याक्सिन सबैभन्दा अगाडि रहेको छ ।
यसअगाडि अमेरिकी सरकारले नोभाभ्याक्सको भ्याक्सिन निमार्णको गतिलाई द्रुतता दिन १ दशमलव ६ बिलियन डलर प्रदान गर्ने सहमति गरेको थियो । यो कम्पनीले आगामी जनवरीसम्म १ सय मिलियन डोज डेलिभरी गर्ने लक्ष्य लिएको छ ।
त्यस्तै सरकारले गत मार्चमा जोन्सन एण्ड जोन्सनको भ्याक्सिन निर्माणका लागि ४५६ मिलियन लगानी गर्ने घोषणा गरेको थियो । त्यस्तै मोडेर्ना कम्पनीले बनाइरहेको भ्याक्सिनलाई ४८६ मिलियन र आस्ट्राजेनेका कम्पनीले बनाइरहेको भ्याक्सिनलाई १ दशमलव २ बिलियन डलर तिर्न अमेरिकाले सहमति जनाइसकेको छ । अक्सफोर्ड युनिभर्सिटीसँग मिलेर आस्ट्राजेनेका कम्पनीले विकाश गरेको भ्याक्सिनको एकहजार बढीमा सफल परीक्षण भइसकेको छ ।
अमेरिकी सरकारले इमर्जेन्ट बायो सोलुसनलाई सम्भावित भ्याक्सिनको घरेलु उत्पादन बढाउनका लागि ६२८ मिलियन डलर दिने सहमति जनाइसकेको छ । भ्याक्सिन कम्पनीहरुले आगामी डिसेम्बरसम्म भ्याक्सिन सबैको प्रयोगका लागि ल्याउन दु्रत गतिमा काम गरिरहेका छन् ।
