यस्तो छ न्युयोर्कका गैर नाफामुलक नेपाली संघसंस्थाहरुको आम्दानी खर्च विवरण
प्रकाशित मिति : श्रावण ५, २०७७ सोमबार
न्युयोर्कमा कैयन गैरनाफामुलक नेपाली संघसंस्थाहरु रहेका छन् । तीमध्ये अधिकांशको बार्षिक आम्दानी ५० हजारभन्दा कम रहेको छ । तर केही संस्थाहरुको बार्षिक आम्दानी त्योभन्दा धेरै रहेको आईआरएसको रेकर्डले देखाएको छ । हामीले ५० हजारभन्दा बढी आम्दानी भएका केही गैरनाफामुलक नेपाली संस्थाको खर्च विवरण खोतलेका छौं । न्युयोर्कमा नेपाली समुदायमाझ चर्चित नेपाली जनसम्पर्क समिति, अधिकार, शेर्पा किदुग र रिजउड नेपाली समाजको आम्दानी खर्च विवरण हामीले नियाल्ने प्रयास गरेका छौं ।
उडसाइडमा प्रधान कार्यालय रहेको नेपाली जनसम्पर्क समिति अमेरिकाले सन् २०१७ देखि यता आफ्नो बार्षिक आम्दानी ५० हजार डलरभन्दा कम देखाउँदै आएको छ । तर २०१६ मा भने यो संस्थाको आम्दानी झण्डै ९५ हजार रहेको देखाइएको छ । २०१५ मा नेपालमा गएको महाभूकम्पपछि यो संस्थाले उल्लेख्य डोनेशन रकम उठाउन सफल भएको थियो ।
त्यस्तै एल्महस्र्टमा प्रधान कार्यालय रहेको युनाइटेड शेर्पा एसोसिएसन अमेरिका अर्थात शेर्पा किदुग अमेरिकाले २०१६ मा डोनेशन र अन्य आम्दानीबाट झण्डै १ लाख ८४ हजार डलर प्राप्त गरेको थियो, जसमध्ये कर्मचारीहरुको तलबभत्ता र कामका लागि झण्डै १८ हजार डलर खर्च गरिएको थियो भने अन्य खर्च झण्डै ८५ हजार डलर गरिएको थियो ।
शेर्पा किदुगले सन् २०१६ मा १ लाख १० हजार डलर खर्च गरेको आईआरएसको रेकर्डले देखाएको छ । त्यस्तै २०१७ मा डोनेशन र अन्य आम्दानी गरी ३ लाख १२ हजार प्राप्त गरेको थियो भने तलबभत्ता र कामका लागि झण्डै ३३ हजार र अन्य खर्च झण्डै १ लाख ८८ हजार सहित कुल खर्च २ लाख ५२ हजार गरेको थियो ।
त्यस्तै २०१८ मा डोनेशन र अन्य आम्दानी गरी झण्डै ३ लाख १८ हजार प्राप्त गरेकोमा झण्डै ५६ हजार तलबभत्ता र कामका लागि खर्च गरेको थियो । त्यस्तै अरु खर्च झण्डै २ लाख ५३ हजारसहित झण्डै ३ लाख २० हजार खर्च गरिएका थियो भने उक्त बर्ष झण्डै २४ सय डलर घाटा भएको थियो । कुल खर्चको झण्डै २ लाख ५८ हजार डलर कार्यक्रम र सेवाहरुमा खर्च गरिएको थियो ।
त्यस्तै नेपाली र नेपालीभाषीको अधिकारका लागि कृयाशिल संस्था अधिकारले सन् २०१५ मा डोनेशन, ग्रान्ट लगायतबाट १० लाख ८० हजार डलर प्राप्त गरेको थियो । जसमध्ये तलबभत्ता र कामका लागि झण्डै ४ लाख ६९ हजार र अन्य झण्डै २ लाख ४१ हजार गरी ७ लाख ११ हजार डलर खर्च गरेको थियो । यो संस्थाले २०१६ मा ग्रान्ट, डोनेशन लगायतबाट झण्डै ११ लाख डलर प्राप्त गरेको थियो भने उक्त बर्ष तलबभत्ता र कामका लागि झण्डै ५ लाख ७७ हजार र अन्य खर्च झण्डै ३ लाख ६ हजार गरी कुल झण्डै ८ लाख ८४ हजार खर्च गरेको थियो ।
अधिकारले सन् २०१७ मा डोनेशन र ग्रान्टबापत झण्डै १२ लाख ८७ हजार डलर प्राप्त गरेको थियो । उक्त बर्ष कर्मचारीको तलबभत्ता र कामका लागि झण्डै ६ लाख ३४ हजार खर्च गरिएको थियो भने अन्य २ लाख ६४ हजारसहित कुल खर्च ८ लाख ९८ हजार डलर रहेको थियो ।
न्युयोर्कको अर्को चर्चित संस्था रिजउड नेपाली समाजले सन् २०१८ मा डोनेशन, ग्रान्ट लगायतबाट कुल आम्दानी झण्डै १ लाख ८८ हजार डलर गरेको थियो भने सदस्यहरुका लागि बेनिफिट दिएको शीर्षकमा झण्डै ६१ हजार डलर खर्च गरेको थियो । तलबभत्ता र कामका लागि शुन्य डलर खर्च गरेको यो संस्थाले २०१८ मा जम्मा खर्च झण्डै ६६ हजार गरेको थियो ।
२०१७ मा यो संस्थाले डोनेशन, ग्रान्ट लगायतबाट कुल आम्दानी झण्डै १ लाख ९१ हजार गरेको थियो । जसमध्ये सदस्यहरुलाई बेनिफिट दिइएको शीर्षकमा झण्डै १ लाख ५ हजार सहित कुल खर्च झण्डै १ लाख १८ हजार गरेको थियो ।
२०१६ मा डोनेशन, ग्रान्ट लगायतबाट झण्डै ४८ हजार प्राप्त गरेकोमा खर्च झण्डै ४९ हजार गरिएको थियो भने सन् २०१५ मा आम्दानी १ लाख ७ हजार गरिएकोमा खर्च झण्डै ८८ हजार गरिएको थियो । सन् २०१५ मा यो संस्थाले आम्दानी झण्डै ७० हजार र खर्च झण्डै ५० हजार गरेको ट्याक्स रेकर्डमा उल्लेख छ । गतबर्षको ट्याक्स रेकर्ड अनुशार यो संस्थाको चल अचल सम्पत्ति झण्डै ६ लाख २५ हजार डलर रहेको छ ।