न्युयोर्कको तापक्रम सोमबार १ सय डिग्री फरेनहाइटसम्म पुग्ने, यस्तो छ सरकारी तयारी
प्रकाशित मिति : श्रावण ३, २०७७ शनिबार
(English) न्युयोर्कको तापक्रम आइतबारदेखि अत्याधिक बढ्ने भन्दै न्युयोर्क सिटी सरकारका तर्फबाट सुचना जारी गरिएको छ । अत्याधिक तापक्रमको सामना गर्नका लागि न्युयोर्कबासीहरुलाई केही सुझावहरु दिइएको छ भने सिटी सरकारले कैयन तयारीहरु गरेको छ ।
नेशनल वेदर सर्भिसले आइतबार दिउसो मध्यान्हदेखि सोमबार बेलुका ८ बजेसम्मका लागि हिट एड्भाइजरी जारी गरेको छ । आइतबार ९० डिग्री फरेनहाइटभन्दा माथि पुग्ने तापक्रम सोमबार १ सय डिग्री फरेनहाइटको आसपासमा हुने जनाइएको छ ।
न्युयोर्क सिटीले तयारीका लागि पार्कहरुमा २३० भन्दा धेरै कुलिङ र मिस्ट साइटहरु बनाएको छ भने न्युयोर्कसिटीभर १६० भन्दा धेरै कुलिङ सेन्टरहरु खोलिने भएको छ । न्युयोर्क सिटीभर ३ सय भन्दा धेरै हाइडे्रन्टसहरु खोलिने भएको छ भने सिटीका पार्कहरुमा ६५० भन्दा धेरै स्प्रे शावरहरु खोलिनेछ । सिटीले कम आम्दानी भएका ४० हजारभन्दा धेरै बृद्धबृद्धाका लागि एसीहरु जडान गरिसकेको जनाएको छ ।
नजिकको कुलिङ सेन्टर पत्ता लगाउनका लागि ३११ मा फोन गर्न सकिनेछ । साथै अनलाइनमार्फत पनि चिसो बनाउने तत्वहरु थाहा पाउन सकिनेछ । त्यसका लागि यहाँ क्लिक गर्नुहोला ।
कुलिङ सेन्टर कुन कुन स्थानमा छ भन्ने थाहा पाउन यहाँ क्लिक गर्नुहोला ।
घरमा एयर कन्डिशनर हुनेहरुलाई घरमै एयर कन्डिशनर चलाएर बस्न न्युयोर्कका आपतकालिन व्यवस्थापन कमिश्नर डिन क्रिशवेलले सुझाव दिएका छन् । घरमा एसी नहुनेहरुलाई कुलिङ सेन्टरमा जान सुझाव दिइएको छ ।
एसी प्रयोग नगर्नेहरु वा एसी नहुनेहरु तापक्रम सम्बन्धित रोगको शिकार हुनसक्ने न्युयोर्क सिटीका हेल्थ कमिश्नर ओक्सिरिस बार्बोटले बताएका छन् । उनले न्युयोर्कबासीहरुलाई दिनको केही घण्टा भएपनि एसीमा बस्न, हलुका कपडा लगाउन, प्रसस्त तरल पदार्थ पिउन र वाहिरका गतिविधिमा सकभर सहभागी नहुन सुझाव दिएका छन् ।