मंगलबारदेखि न्युयोर्क आउनेलाई कडा नियम, नियम नमान्नेलाई २ हजार डलर जरिवाना
प्रकाशित मिति : असार २९, २०७७ सोमबार
(English) न्युयोर्कका गभर्नर एन्ड्रयु कुमोले एक कार्यकारी आदेश जारी गर्दै भोलिदेखि न्युयोर्क आउनेहरुका सन्दर्भमा कडा नियम लागु गरेका छन् । अहिलेका लागि अमेरिकाका विभिन्न १९ वटा राज्यबाट न्युयोर्क आउनेहरुका लागि यो नियम लागु हुनेछ ।
तोकिएका राज्यबाट न्युयोर्क आउनेहरुले न्युयोर्क आउनासाथ आफ्नो सम्पर्क विवरण बुझाउनुपर्ने र नबुझाउनेलाई २ हजार डलर जरिवानाका साथमा अदालतमा बोलाइने कार्यकारी आदेशमा उल्लेख छ । एयरपोर्टमा आउनसाथ कहाँबाट आएको हो र कहाँ जाने हो भन्ने सन्दर्भमा सबै विवरणहरु उल्लेख गरेको फर्म भर्नुपर्नेछ ।
१९ वटा राज्यबाट न्युयोर्क आउनेहरुलाई एयरपोर्टमा भर्न लगाइने भएको छ । अवतरणपछि विमानस्थल छाड्नुअगाडि उक्त फर्म अधिकारीहरुलाई बुझाउनुपर्नेछ । सिप, बस, ट्रेन र कारबाट न्युयोर्क आउनेहरुले पनि उक्त फर्म भर्नुपर्नेछ ।
उक्त फर्मको इलेक्ट्रोनिक भर्सन यहाँ उपलब्ध छ ।
मंगलबारदेखि नै पोर्ट अथोरिटी र विमानस्थलहरुमा उक्त फर्मको प्रमाण संकलन गर्न कार्यान्वयन टिम तैनाथ गरिने भएको छ ।
उक्त फर्म नभर्ने व्यक्तिलाई २ हजार डलर जरिवानासहित अदालतमा बोलाइने र अदालतले उनीहरुलाई अनिवार्य क्वारेन्टीनको आदेश दिने जनाइएको छ । न्युयोर्क र न्युजर्सीको पोर्ट अथोरिटी न्युयोर्क सिटी क्षेत्रमा उक्त नियम कार्यान्वयनका लागि जिम्मेबार हुनेछ । राज्यका अरु सबै क्षेत्रमा स्थानीय विमानस्थलहरुले नियम कार्यान्वयन गर्नुपर्नेछ ।
कार्यकारी आदेशको पूर्ण पाठ यहाँ पढ्नुहोला ।
न्युयोर्कले कोरोना भाइरस फैलिएका राज्यबाट आउनेहरुलाई अनिवार्य क्वारेन्टीनको नियम जुनबाट कार्यान्वयनमा ल्याएको हो । कतिपय विज्ञहरुले यो नियम कार्यान्वयनमा कठिन भएको बताउँदै आएका छन् । कुमोले सुरुमा नियम कार्यान्वयनका सन्दर्भमा छड्के चेक गरिने बताएका थिए ।
अहिले अलाबामा, अर्कान्सास, एरिजोना, क्यालिफोर्निया, डेलावर, फ्लोरिडा, जर्जिया, आयोवा, आइदाओ, कन्सास, लुजियाना, मिसिसिपी, नर्थ क्यारोलिना, नेभाडा, ओक्लाहोमा, साउथ क्यारोलिना, टेनिसी, टेक्सास र युटाहबाट न्युयोर्क आउनेले अनिवार्य १४ दिन सेल्फ क्वारेन्टीनमा बस्नुपर्छ ।