बाइडेनले उपराष्ट्रपति उम्मेदवार अश्वेत छान्नुपर्ने भन्दै पछि हटिन् एमी क्लोबुचार
प्रकाशित मिति : असार ४, २०७७ बिहीबार
.
अमेरिकी राष्ट्रपतिका लागि डेमोक्रेटिक उम्मेदवार जो बाइडेनले आफ्नो उपराष्ट्रपतिका लागि अश्वेत अमेरिकनलाई छान्नुपर्ने भन्दै सिनेटर एमी क्लोबुचार पछाडि हटेकी छिन् । राष्ट्रपतिको चुनावमा उम्मेदवार बाइडेनले उपराष्ट्रपतिका लागि एमी क्लोबुचारलाई छनौट गर्ने चर्चा भएपनि उनी औपचारिक रुपमा पछाडि हटेकी हुन् ।
यो ऐतिहासिक क्षण भएको र अमेरिकाले यो ऐतिहासिक क्षणलाई मुठ्ठीमा लिन आवश्यक भएको भन्दै एमी क्लोबुचारले अश्वेत महिलालाई टिकटमा राख्नुपर्ने बताएकी छिन् । उनलाई बाइडेनको उपराष्ट्रपतिका रुपमा आउन प्रस्ताव गरिएको थियो । उनले अमेरिकामा कैयन योग्य अश्वेत महिलाहरु रहेको उनको भनाईछ ।
केही महिनादेखि क्लोबुचारको नाम उपराष्ट्रपति उम्मेदवारका लागि चर्चामा रहेको थियो । उनले सुरुमा डेमोक्रेटिक प्राइमरीमा राष्ट्रपतिका लागि उम्मेदवारी घोषणा गरेपनि पछि उम्मेदवारी फिर्ता लिएकी थिइन् ।
यसरी हुन्छ अमेरिकामा राष्ट्रपति चुनाव
अमेरिकी चुनावमा मतदान गर्न योग्य अमेरिकीहरुले इलेक्टोरल मतका लागि इलेक्टरहरु छान्नका लागि अमेरिकी इलेक्टोरल कलेजका सदस्यहरुका लागि मतदान गर्दछन् । त्यस्ता इलेक्टरहरुले पहिले नै आफूले कुन उम्मेदवारका लागि मतदान गर्ने भन्ने सार्वजनिक गरिसकेका हुन्छन् । जनताबाट छानिएका इलेक्टरहरुले राष्ट्रपति र उपराष्ट्रपतिका लागि इलेक्टोरल मतदान गर्दछन् । मतदानपछि पूर्ण बहुमतप्राप्त उम्मेदवारलाई विजेता घोषणा गरिन्छ ।
यदि राष्ट्रपतिका लागि कसैले पनि पूर्ण बहुमत प्राप्त गर्न नसकेको खण्डमा प्रतिनिधीसभाले राष्ट्रपति छान्ने र उपराष्ट्रपतिका लागि कसैले पनि पूर्ण बहुमत प्राप्त गर्न नसकेमा सिनेटले उपराष्ट्रपति छान्ने व्यवस्था रहेको छ । जम्मा ५३८ इलेक्टोरल मतमध्ये विजेता हुनका लागि कम्तीमा २७० मतको आवश्यकता पर्छ ।
५० वटा राज्य र वासिंटन डिसीबाट जनसंख्याको अनुपातको आधारमा ५३८ इलेक्टोरल मतको तय गरिएको छ । धेरैजसो अमेरिकी राज्यले प्राय एउटै दलका उम्मेदवारहरुलाई जिताउने गरेपनि फ्लोरिडा, पेन्सिलभेनिया र ओहायोको महत्व भिन्न रहेको छ । यी राज्यहरुले राष्ट्रपतीय चुनावमा आफ्नो अभिमत बदल्दै आएका छन् । तीनको निर्णयले सबै चुनावी परिणाम बदल्न सक्ने भएकाले यी तीन राज्यलाई विशेष महत्वका साथ हेर्ने गरिन्छ ।
सन् २०१२ को राष्ट्रपतीय चुनावमा बराक ओबामाले ३३२ इलेक्टोरल मत प्राप्त गरेका थिए भने मिट रोम्नीले २०६ इलेक्टोरल मत प्राप्त गरेका थिए । सन् २००८ को राष्ट्रपतीय चुनावमा भने ओबामाले ३६५ इलेक्टोरल मत प्राप्त गरेका थिए । त्यतीबेला उनका प्रतिस्पर्धी जोन म्याकनले १७३ इलेक्टोरल मत प्राप्त गरेका थिए । सन् २०१२ को चुनावसम्म आइपुग्दा ओबामाको लोकप्रियता कम भएको थियो ।