लकडाउनमा नेपाल छाड्ने विदेशीमा सबैभन्दा धेरै अमेरिकन, ८६५ जना फर्किए अमेरिका
प्रकाशित मिति : जेष्ठ ३२, २०७७ आईतबार
कोरोनाको महामारी सुरुभएदेखि मार्च २७ पछि जुन ८ सम्म ८६५ जना अमेरिकनहरुले नेपाल छाडेका छन् । जसमा नेपाली मुलका अमेरिकनहरुको संख्या समेत उल्लेख्य छ ।
मार्च २४ देखि नेपाल सरकारले मुलुकभर लकडाउनको घोषणा गरेर सबै अन्तर्राष्ट्रिय उडान र सीमा नाकाहरु बन्द गर्ने घोषणा गरेको थियो । त्यसपछि अमेरिकाले दुईपटक विमान चार्टड गरेर आफ्ना नागरिकहरु फिर्ता लगिसकेको छ ।
त्यो बाहेक कतार एयरवेजमार्फत दोहा आएर र टर्किस एयरवेजमार्फत इस्तानबुल आएर नियमित उडानमार्फत अमेरिका आउने अमेरिकनहरुको संख्या पनि २ सयको हाराहारीमा रहेको छ । नेपालमा रहेका अन्य अमेरिकनहरु पनि अमेरिका आउने तयारीमा रहेका छन् ।
लकडाउनको अवधिमा चार्टड उडानमार्फत विभिन्न देशहरुले आफ्ना नागरिकहरु उद्दार गरेर लैजान सकिने नेपाल सरकारले व्यवस्था गरेको थियो । ती चार्टड उडानहरुमार्फत नेपालबाट बाहिरिने विदेशीहरुमा सबैभन्दा धेरै अमेरिकनहरु छन् ।
यो अवधिमा ६९४ जना बेलायती पासपोर्ट हुनेहरुले नेपाल छाडेका छन् । ७०१ जना जर्मन र ५७५ जना फ्रेन्च नागरिकहरुले यो अवधिमा नेपाल छाडेका छन् । त्यस्तै अष्ट्रेलियनहरु ५१७, क्यानेडियनहरु २२४, चाइनजिहरु ३४९, भारतीयहरु १९७ जना, जापानिजहरु २९६ जना र दक्षिण कोरियनहरु ३२३ जनाले यो अवधिमा नेपाल छाडेका छन् । उनीहरु सबैजना त्रिभुवन अन्तर्राष्ट्रिय विमानस्थलबाट फर्कनेहरु हुन् ।