अमेरिकाको जर्जियामा १३ हप्ता थपियो बेरोजगारी विमाको सुविधा
प्रकाशित मिति : जेष्ठ २९, २०७७ बिहीबार
अमेरिकाको जर्जियामा बेरोजगारी विमाको सुविधा अरु १३ हप्ता थपिएको छ । कोरोनाको महामारी सुरु भएयता बेरोजगारी सुविधा अन्तरगत साढे २ बिलियन डलर खर्चिसकेको जर्जियाले बेरोजगारी विमा रकम प्राप्त गर्ने हप्ता समाप्त भइसकेकाहरुका लागि अरु १३ हप्ता थपेको घोषणा गरेको छ ।
महामारी आपतकालिन बेरोजगारी क्षतिपूर्ति नाम दिइएको उक्त कार्यक्रम केयर्स एक्टकै अंश हो । यो कार्यक्रम अन्तरगत बेरोजगारी सुविधा लिनेहरुले आफ्नो नियमित सुविधाको साता समाप्त भइसकेको भएपनि थप १३ हप्तासम्म रकम प्राप्त गर्नसक्नेछन् ।
जर्जियामा १३ हप्तासम्ममात्र बेरोजगारी सुविधा लिन सकिने प्रावधान रहेकोमा थप १३ हप्ता बढाइएकाले अब उनीहरुले २६ हप्तासम्म बेरोजगारी सुविधा रकम लिन सक्नेछन् । न्युयोर्कमा बेरोजगारी विमाको रकम २६ हप्तासम्म लिन पाइने नियम रहेपनि जर्जियामा भने त्यहाँको बेरोजगारी दरका आधारमा हप्ता निर्धारण गरिदै आएको छ ।
मार्चको दोश्रो सातादेखि बेरोजगारी सुविधा लिनेहरुको अवधि यसै साता समाप्त हुन लागेको अवस्थामा १३ हप्ता थपिदा उनीहरुलाई राहत मिलेको छ । अब उनीहरुले लगभग अगस्तको अन्त्यसम्म बेरोजगारी सुविधा लिन सक्नेछन् । तर साप्ताहिक ६ सय डलरभने जुलाईको अन्तिमसम्ममात्र प्राप्त हुनेछ ।
