भूमि फिर्ताको माग गर्दै एनआरएन क्षेत्रिय समितिले राष्ट्र संघमा ज्ञापन पत्र बुझायो
प्रकाशित मिति : जेष्ठ २८, २०७७ बुधबार
गैरआवासीय नेपाली संघ अमेरिकाज क्षेत्रिय समितिले नेपालको अतिक्रमित भूमि फिर्ताको माग गर्दै संयुक्त राष्ट्र संघमा ज्ञापन पत्र बुझाएको छ । राष्ट्र संघको सुरक्षा परिषद्का लागी अमेरिकी राजदूत केली क्राफ्ट मार्फत भारतले अतिक्रमण गरेको नेपाली भूमि फिर्ताको माग गर्दै ज्ञापन पत्र बुझाइएको हो ।
अमेरिकाज क्षेत्रिय संयोजक राजन त्रिपाठीका अनुसार ज्ञापन पत्रमा भनिएको छ – ‘कालि नदिपूर्वको भूभाग नेपालको हो भन्ने यथेष्ट प्रमाण हुँदाहुँदै भारतले सीमा अतिक्रमण गरेको छ, त्यो अतिक्रमित भूमि फिर्ताका लागि पहल गरिदिन हामी राष्ट्र संघलाई अनुरोध गर्दछौं ।’
संयोजक त्रिपाठीले भने-‘सुगौली सन्धीको बुँदा नम्वर ५ मा महाकाली नदिपूर्वको भाग नेपालको हुनेछ भनेर प्रष्ट लेखिएको छ, नेपालसंग यस्तै थुप्रै यथेष्ट प्रमाणहरु छन्, भन्ने कुरा समेत हामीले ज्ञापनपत्रमा उल्लेख गरेका छौं ।’
सन् १८१६ मा तत्कालिन भारत सरकार र नेपाल सरकारका बीच भएको सन्धिले महाकली नदिलाई नेपालको पश्चिम सीमा मानेको छ । महाकाली नदिको मुहान लिम्पियाधुरा भएको त्यसपूर्वको करिब ४ सय किलोमिटर भूमी भारतले बषौंदेखी अतिक्रमण गरेको र लिपुलेक हुदै तिब्बत जाने बाटो समेत बनाएको जानकारी समेत गराइएको छ ।
ज्ञापन पत्रको साथमा कालीको मुहान लिम्पियाधुरा हो भन्ने प्रमाणित नक्सा, त्यस क्षेत्रका जनताले नेपाल सरकारलाई तिरेको तिरो रसिद, जनगणना, स्थानिय निर्बाचनमा गरिएको मतदानको रेकर्ड साथमा नेपाली नक्सा समेत पेश गरिएको छ । राजदुत केलीका सल्लाहकार अहमद शामालाई संयोजक राजन त्रिपाठीले ज्ञापन पत्र हस्तान्तरण गरेका छन् ।
ज्ञापन पत्रको बोधार्थ अमेरिकी सिनेटको कार्यलय, अमेरिकी बिदेश मन्त्रालय, संयुक्त राष्ट्र संघका महासचिव, नेपालको परराष्ट्रमन्त्रालय र संयुक्त राष्ट्र संघका लागी नेपाली स्थायी नियोगलाई समेत बुझाइएको छ ।