डा. भट्टराईको अन्तर्वार्ताबारे स्पष्टीकरण सोधिएका रेडियो नेपालका कार्यकारी निर्देशकबाट राजिनामा
प्रकाशित मिति : जेष्ठ २७, २०७७ मंगलबार
डाक्टर बाबुराम भट्टराईको विवादास्पद अन्तर्वार्ता लिएको विषयमा सञ्चार तथा सूचना प्रविधि मन्त्रालयले स्पष्टीकरण सोधेका रेडियो नेपालका कार्यकारी निर्देशक सुरेश कुमार कार्कीले पदबाट राजीनामा दिएका छन् । केही समय अघि डा भट्टराईको विवादास्पद अन्तर्वार्ता लिएको विषयमा सञ्चार तथा सूचना प्रविधि मन्त्रालयले कार्कीलाई तीन दिने स्पष्टीकरण माग गरेको थियो ।
कार्कीले मङ्गलवार सञ्चार तथा सूचना प्रविधि मन्त्रालयमार्फत प्रधानमन्त्री तथा मन्त्रिपरिषद्को कार्यालय समक्ष राजीनामा पेस गरेका हुन् । २०६९ मङ्सिर १९ गतेको मन्त्रिपरिषद् निर्णयबाट पहिलो पटक चार वर्षका लागि नियुक्त भएका थिए ।
कार्की २०७३ माघ ६ गते दोस्रो पटक थप चार वर्षका लागि नियुक्त भएका थिए । तर दोस्रो कार्यकालको ६ महिना अवधि बाँकी हुँदै कार्कीले पदबाट राजिनामा दिएका हुन् ।
पूर्व प्रधानमन्त्री डा. बाबुराम भट्टराईलाई आमन्त्रण गरी जातीय विद्वेष, घृणा उब्जाएको, सत्ता कब्जा, पङ्गु, निरङ्कुश शासक र भष्माशुर जस्ता भ्रमपूर्ण र लाञ्छनायुक्त शब्द सरकारका विरुद्धमा प्रयोग भएको संवाद प्रत्यक्ष प्रसारण भएको पाइएको भन्दै त्यसबारे तीन दिन भित्र स्पष्टीकरण पेस गर्न मन्त्रालयकी सहसचिव राधिका अर्यालले पत्र काटेकी थिइन् ।