अमेरिका आउँदाको ऋण चुक्ता नहुँदै ज्यान गुमाएका आशिषको दाहसंस्कार भोलि, सहयोगको अपिल
प्रकाशित मिति : जेष्ठ ६, २०७७ मंगलबार
मेरिल्याण्डमा आइतबार निधन भएका २५ बर्षका नेपाली युवा आशिष केसी दाहसंस्कार भोलि गरिने भएको छ । मेरिल्याण्ड क्रिमेशन सर्भिसमा दाहसंस्कार गरिने तय भएको मेरिल्याण्ड राज्यको संसदमा प्रतिनिधित्व गर्ने सांसद ह्यारी भण्डारीले जानकारी दिएका छन् ।
उनको दाहसंस्कारको खर्च भण्डारीको परिवारले बेहोर्ने भएको छ । वाग्लुङ जिल्ला घर भई मेरिल्याण्डमा वस्दै आएका केसीको मेरिल्याण्डको युनिभर्सिटी अफ वाल्टिमोर वाशिङ्गटन मेडिकल सेन्टरमा निधन भएको थियो ।
यसैबीच आशिषको परिवारको सहयोगका लागि गोफण्डमीमा सहयोग संकलन अभियान चलाइएको छ । वाग्लुङ समाज, एनआरएनए मेरिल्याण्ड र बानाका तर्फबाट सहयोग संकलन अभियान चलाइएको हो ।
आशिषको परिवारलाई सहयोग गर्न यहाँ क्लिक गर्नुहोला ।
सहयोगको अपिल गर्दै फण्डपेजमा भनिएको छ – ‘नेपाल देखि अमेरिका आउने क्रममा बाटोमा विभिन्न दुख, कष्ट झेल्दै अन्तत अमेरिका आई पुगी कानुनी कागजी प्रकृयामै रहेको अवस्थामा उनको सबै सुनौला सपनाहरुमा पुर्ण विराम लागेको छ ।’
‘आशिषका आमाबाबु आशाको केन्द्रविन्दु रहेको छोरा गुमाउनुको मानसिक तनावमा त छदैछन् । अर्को तर्फ उनी अमेरिका आउने क्रममा खर्चिएको ठुलो रकम तिर्न बाँकी रहेकाले उक्त रकम तिर्नु पर्ने आर्थिक ज़िम्मेवारी पनि बुबाआमा थपिएको छ । नेपालमा रहेका परिवारजनमा राहत सहयोग पुग्न सकोस् भनि सबैबाटसहयोगका लागी अनुरोध गर्दछौ ।’ – गोफण्डमीमा सहयोगको अपिल गर्दै भनिएको छ ।
विगत तीन वर्ष देखि मेरिल्याण्डमा वस्दै आएका आशिष गत शुक्रवार मेरिल्याण्डको रिची हाईवे नजिकको तलाउमा डुबेका थिए । उद्धारकर्ताहरुले उद्धार गरि मेरिल्याण्डको युनिभर्सिटी अफ वाल्टिमोर वाशिङ्गटन मेडिकल सेन्टरमा उपचार गर्ने क्रममा आईतवार उनको निधन भएको हो ।
भण्डारीका अनुशार शुक्रवारको दिन आशिष केसी सहित भतिजा र अन्य साथीहरु समेत मिलेर गएका थिए । तलाउमा डुबेर पानीको मध्य भागमा पुगेपछि आशिष चिच्याएपछि सँगै पुगेका साथीहरु र अन्यले उद्दारको प्रयास गरेका थिए । तर उनीहरु सफल हुन सकेनन् ।
त्यही बीचमा अरु साथीहरुले स्थानीय प्रहरी र उद्दार कर्ताहरुलाई ९११ मा खवर गरेपछि तुरुन्त हेलिकप्टर सहितको टोलीले उहाँको उद्धार गरेका थिए । उद्धारमा रहेको सिपिआर टोलीले अस्पताल लगेका थिए । अस्पतालमा आपतकालीन सेवामा रहेका चिकित्सकहरुले तत्काल उनको उपचारको प्रक्रिया थालनी गरेका थिए ।
डाक्टरले तीन पटक सम्म वन्द भएको मुटुको धडकनलाई फर्काउन सफल भएका थिए । सँगै २० घण्टा सम्म शरीरलाई वार्म गराउदै मेकानिकल भेन्टिलेटरमा राखिएको र फेल भएको मृगौला डायलिसस समेत गराइएको थियो ।
आशिषको अस्पताल पुराउने समयसम्म मुटुको धडकन अवरुद्ध भएको,मृगौला फेल भएको र मस्तिष्कमा समेत गम्भिर असर परिसकेको थियो । उपचारमा संलग्न चिकित्सकहरुले उच्च प्रकारको मेडिकेशन चलाएर व्रेन वेभ मनिटर मार्फत मस्तिष्कको जाँच गर्दा अक्सिजनको कमी भएको र मृगौला समेत फेल भईसकेको थियो ।