आजमात्रै न्युयोर्कमा बेरोजगारी विमा आवेदकलाई ५ लाख इमेल र टेक्स्ट
प्रकाशित मिति : जेष्ठ ५, २०७७ सोमबार
आजमात्रै न्युयोर्कको डिपार्टमेन्ट अफ लेवरले बेरोजगारी विमा आवेदकलाई ५ लाख इमेल र टेक्स्ट पठाएको जनाएको छ । उनीहरुको आवेदनको अवस्थाबारे जानकारी दिन इमेल पठाइएको डिपार्टमेन्ट अफ लेवरले जनाएको छ ।
आवेदन प्राप्त भएको अवस्थामा, आवेदन साप्ताहिक प्रमाणिकरणका लागि तयार भएको अवस्थामा र रकम पठाउन तयार भएको अवस्थामा उक्त अपडेटसहित डिपार्टमेन्ट अफ लेवरले इमेल पठाउने गरेको छ ।
यसैबीच आज बेरोजगारी विमा रकमको लागि आवेदन दिने फर्ममा सानो प्राविधिक समस्या आएको समेत न्युयोर्क डिपार्टमेन्ट अफ लेवरले जनाएको छ । प्राविधिक समस्या आउँदा आवेदकले भरेको भन्दा फरक जवाफ फर्मबाट अटोमेटिक रुपमा सब्मिट हुने अवस्था आएको थियो ।
तर यस्तो अवस्थामा पनि आवेदनमा कुनै नकारात्मक असर भने नगर्ने डिपार्टमेन्ट अफ लेवरले जनाएको छ । आफूहरु उक्त समस्या समाधानका लागि काम गरिरहेको र उक्त समस्याका कारण आवेदकले पाउने रकममा कुनै फरक नपर्ने डिपार्टमेन्ट अफ लेवरको भनाई छ ।
आवेदन दिंदा तपाईको कार्यस्थल कोरोनाको कारण बन्द भएको थियो कि ? भन्ने प्रश्नमा ‘थियो’ भन्ने जवाफ उल्लेख गरेपनि आवेदन सब्मिट गर्दा भने सांरांशमा अटोमेटिक रुपमा ‘थिएन’ उल्लेख हुने समस्या देखिएको सेवाग्राहीहरुले गुनासो गरेका छन् ।
यदि यस्तो अवस्थामा आवेदकले आवेदन बुझाएको छ भने पनि उसको आवेदनमा नकारात्मक असर नपर्ने डिपार्टमेन्ट अफ लेवरले जनाएको छ ।
त्यस्तै यदि कुनै व्यक्तिले नियमित रुपमा बेरोजगारी विमा रकम प्राप्त गरिरहेको छ वा विमा रकम पाउनका लागि योग्य भएको सुचना आएको छ भने उसले थप विवरण बुझाउन नपर्ने डिपार्टमेन्ट अफ लेवरले जनाएको छ । तर यदि रकम प्राप्त भइसकेको छैन वा रकम प्राप्त गर्नका लागि आवेदन योग्य भएको सुचना पाउनुभएको छैन भने तथा डिपार्टमेन्ट अफ लेवरले कुनै विवरण वा प्रश्नको जवाफ मागेको छ भने आवेदकले उक्त विवरण बुझाउनुपर्नेछ ।
यदि आवेदकको एकाउन्ट रकम प्राप्त गर्न योग्य भएको इमेल वा टेक्स्ट प्राप्त भएको छ भने ती आवेदकले एकसाताभित्र रकम पाउन सुरु गर्ने डिपार्टमेन्ट अफ लेवरको भनाई छ ।