‘नागरिक भन्दै ढाँट्ने ग्रिनकार्डवाहक पनि देशनिकालामा पर्नसक्छन्’ – रमेश श्रेष्ठ
प्रकाशित मिति : बैशाख १६, २०७७ मंगलबार
कानुन व्यवसायी रमेश श्रेष्ठ
अमेरिकी सरकारको युएससीआईएसले अपडेट गरेको नीति अनुशार विगतमा आफू अमेरिकी नागरिक भएको भन्दै ढाँटेका ग्रिनकार्डवाहक समेत अमेरिकाबाट देशनिकालामा पर्नसक्ने अमेरिकाका चर्चित कानुन व्यवसायी रमेश श्रेष्ठले जानकारी दिनुभएको छ । उहाँले भन्नुभयो – ‘यदि विगतमा अमेरिकी नागरिक नभईकनै कसैले अमेरिकी नागरिक हुँ भन्दै ढाँटेको छ भने त्यस्तो व्यक्ति अमेरिकी ग्रिनकार्ड पाउन अयोग्य हुनेछ भने अमेरिकामा स्थायी प्रतिबन्ध लाग्नसक्छ । यदि उसले ग्रिनकार्ड पाइसकेको भने भने ग्रिनकार्ड खारेज गरेर देशनिकालाको प्रकृयामा जानसक्छ ।’
म्याटर अफ झांगको बारेमा बोर्ड अफ इमिग्रेशन अपिलले गरेको फैसलाका आधारमा युएससीआईएसले नीति अपडेट गरेको हो । नीति अनुशार यदि कुनै व्यक्तिले जान वा अन्जानमा नै आफू नागरिक भएको भन्दै ढाँटेर कुनै सुविधा लिएको भएमा त्यसलाई देशनिकालामा राखिने वा अमेरिकामा स्थायी प्रतिबन्ध लगाइने उल्लेख रहेको श्रेष्ठले जानकारी दिनुभयो । तर अब यदि कुनै व्यक्तिसँग अमेरिकी नागरिकताको प्रमाणपत्र छ तर उक्त प्रमाणपत्र उसले विधि र प्रकृयाबाट प्राप्त नगरेको प्रमाणित भएमा त्यस्तो प्रमाणपत्रलाई नागरिकको मान्यता नदिइनेगरी नीति अपडेट गरिएको श्रेष्ठले बताउनुभयो ।
झांगले सन् १९९१ मा अमेरिकाको ग्रिनकार्ड प्राप्त गरेका थिए । त्यसपछि उनले अमेरिकी नागरिकताका लागि आवेदन दिए । तर उनले अमेरिकी नागरिकताको अन्तरवार्ता उत्तिर्ण गर्न सकेनन् । पटकपटक पनि अन्तरवार्ता उत्तिर्ण गर्न नसकेपछि उनले युएससीआईएसका अधिकारीलाई प्रभावमा पारेर विना सपथ नागरिकताको प्रणापत्रप्राप्त गरे । र, उक्त प्रमाणपत्रका आधारमा अमेरिकी पासपोर्ट लिए ।
तर पछि अनुसन्धान हुँदा उनले अमेरिकी नागरिकताको अन्तरवार्ता उत्तिर्ण गरेको रेकर्ड पनि भेटिएन भने उनले सपथ लिएको रेकर्ड पनि भेटिएन । त्यसपछि उनको अमेरिकी नागरिकता खारेज गरियो भने ग्रिनकार्डसमेत खोसेर देशनिकालाको प्रकृयामा राखियो । उनले देशनिकाला हुनबाट त राहत पाए तर उनको अमेरिकी नागरिकता वा ग्रिनकार्ड भने खोसियो । यही मुद्दाका आधारमा युएससीआईएसले व्यक्तिसँग अमेरिकी नागरिकताको प्रमाणपत्र भएपनि त्यो बैध प्रकयाबाट प्राप्त गरेको छैन भने त्यो अमान्य हुने उल्लेख गर्दै नीति अपडेट गरेको कानुन व्यवसायी श्रेष्ठले जानकारी दिनुभयो ।
अमेरिकी नागरिक भएको भन्दै झुठो बोलेकालाई अमेरिकामा स्थायी प्रतिबन्ध लाग्ने नीति
झांगको मामलामा कडा अनुसन्धान भएपछि कैयन युएससीआईएसका अफिसरहरु पनि फसेका थिए । त्यो बेलामा अन्तरवार्ता उत्तिर्ण नगरी वा सपथ नलिई अमेरिकी नागरिकताको प्रमाणपत्र पाउन सफल व्यक्तिहरुका बारेमा पनि अनुसन्धान सुरु गरिएको थियो । जसका कारण यसरी अमेरिकी नागरिकताको प्रमाणपत्र लिएका कैयन परिवारहरु समस्यामा परेका छन् ।
युएससीआईएसले अपडेट गरेको नीति अनुशार रोजगार प्रमाणिकरण फर्ममा समेत आफू अमेरिकी नागरिक नभई अमेरिकी नागरिक उल्लेख गरेर जागिर खाएकाहरु समेत समस्यामा पर्नसक्ने श्रेष्ठको भनाई छ । रोजगारदाताले भर्न दिएको फर्ममा युएस नेशलन र युएस सिटिजनमा झुक्किएर सिटिजनमा टिकमार्क त लगाएकाहरु वा कुनै ऋण वा सुविधा लिनका लागि अमेरिकी नागरिक भएको उल्लेख गरेकाहरुलाई यो नीति अनुशार देशनिकाला र अमेरिकामा स्थायी प्रतिबन्ध लाग्नसक्ने श्रेष्ठले जानकारी दिनुभयो ।