Follow @khasokhasmag

धार्मिक स्थलमा लागू पदार्थ खुवाएर बीसजनाको हत्या


प्रकाशित मिति : चैत्र २०, २०७३ आईतबार

पन्जाब प्रान्तमा सरगोधा शहर नजीकै एउटा सुफी धार्मिक स्थलको रेखदेख गर्ने जिम्मा लिएका एक व्यक्तिले कम्तीमा बीसजना मानिसहरुको हत्या गरेको पाकिस्तानी प्रहरीले जनाएको छ ।

दरबार मोहम्मद अलि भनिने धार्मिक स्थलमा हत्याकाण्ड भएको जनाइएको छ ।

आफुलाई उक्त धार्मिक स्थलको प्रमुख बताउने अब्दुल वहीदले ती व्यक्तिहरुलाई एक एक गर्दै आफ्नो कोठामा बोलाइ उनीहरुलाई लागू पदार्थ खुवाएर धारिलो हतियारले उनीहरुको हत्या गरेको बताइएको छ।

थाना सदर सरगोधामा तैनाथ एकजना प्रहरी मोहम्मद एहसानले शुक्रबार रातीदेखि नै हत्याको सिलसिला शुरु भएको तर प्रहरीले शनिबार रातीमात्रै त्यसबारे थाहा पाएको बताएका छन् । हत्याकाण्डमा बाँच्न सफल चार जनामध्ये एकजनाले प्रहरीलाई सो घटनाबारे बताएका थिए।

घाइतेहरुको स्थानीय अस्पतालमा उपचार भैरहेको छ।

एकजना वरिष्ठ प्रहरी अधिकारीले ५० वर्षीय अब्दुलको मानसिक स्थिति अस्थिर रहेको जस्तो देखिएको बताएका छन्।

आफुलाई सो धार्मिकस्थलको प्रमुख बताउने अब्दुलसंगै उनका तीनजना सहयोगीहरुलाई पनि प्रहरीले पक्राउ गरेका छन्।

प्रहरीले मारिनेहरुमध्ये १७ जना पुरुष र तीन जना महिला भएको तथा उनीहरु सबै दरबार मोहम्मद अली भनिने एक सुफी सन्तका अनुयायीहरु भएको जनाएका छन्।

प्रहरीले सोधपुछका क्रममा अब्दुल वहीदले ती सबै व्यक्तिहरुले सो धार्मिक संस्थाका यसअघिका पीर अहमद गुज्जर लाई विष खुवाउने षडयन्त्रमा भाग लिएको आशंकामा आफुले उनीहरुको हत्या गरेको बताएको जनाएका छन्।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com