न्युयोर्कमा १५ दिनको अन्तरालमा ४ नेपालीको निधन, रहेनन् अजयमान छोंचुँ
प्रकाशित मिति : चैत्र २२, २०७६ शनिबार
न्युयोर्क निवासी अजयमान छोंचुँको आज उपचारका क्रममा निधन भएको छ । छोंचुँको एल्महस्र्ट अस्पतालमा उपचारका क्रममा निधन भएको जनाइएको छ ।
केहीदिनदेखि बिरामी अवस्थामा रहेका उनको अवस्था गम्भिर भएको थियो । आज उपचारकै क्रममा निधन भएको नेवा नख न्युयोर्कका अध्यक्ष बिष्णुमान प्रधानले जानकारी दिए ।
नेवा नख न्युयोर्कले सामाजिक सञ्जालमार्फत श्रद्धाञ्जली व्यक्त गर्दै उनको निधन हृदयघातबाट भएको जनाएको छ । छोंचुँको निधनप्रति दुख व्यक्त गर्दै शोकाकुल परिवारजनमा समवेदनमा व्यक्त गरिएको छ ।
केहीदिन अगाडि अर्जेन्ट केयरमा गएर चेकजाँच गर्दा ब्याक्टेरियल निमोनिया देखिएकोमा अर्जेन्ट केयरले अस्पतालमा जान सुझाव दिएको थियो । त्यसपछि छोंचुँलाई एल्महस्र्ट अस्पतालमा भर्ना गरिएको थियो ।
अस्पतालले एकदुईदिनमा नै डिस्चार्ज गर्ने बताएको थियो । तर अचानक हृदयघात भएका कारण आज दिउसो ४ बजेतिर अस्पतालमा नै निधन भएको जनाइएको छ ।
झण्डै दुईसाता अगाडि परीक्षण गर्दा छोंचुँ र उनकी श्रीमतिमा कोरोना नेगेटिभ देखिएको थियो ।
अस्पतालले फयुनेरल होम बुक गरेर जानकारी दिन भनेको छ । फ्युनरल होम बुक गरिसकेपछि फ्युनेलर होमले नै अस्पतालबाट शव लगेर दाहसंस्कार गर्ने भएकाले दाहसंस्कारमा परिवारका सदस्यहरु उपस्थीत हुने नहुनेमा अन्यौल उत्पन्न भएको छ ।
छोँचुँ न्युयोर्कको क्वीन्स ग्रयाण्ड एभिन्युमा श्रीमतिसँगै बस्दै आएका थिए । उनका छोराबुहारी पनि न्युयोर्कमा नै बस्दै आएका छन् ।
न्युयोर्कमा १५ दिनको अन्तरालमा ४ जना नेपालीको निधन भइसकेको छ । गत मार्च २४ मा अमेरिकामा कोरोना भाइरसको संक्रमणबाट न्यूयोर्कको कुइन्सस्थित ज्याकशन हाइटक्षेत्रमा बसोबास गर्दै आएका ५० बर्षिय अनिल लिम्बुको मृत्यु भएको थियो ।
आजमात्रै न्युयोर्कमा बस्दै आएका मुस्ताङका दुईजना नेपालीको निधन भएको खबर सार्वजनिक भएको थियो ।
झण्डै २० बर्षदेखि अमेरिकामा बस्दै आएका थोक्मे बिष्टको सन्नीसाइडमा बस्दै आएको अपार्टमेन्टमा मृत्यु भएको हो । बिष्ट अपर मुस्ताङको लोमान्थाङका रहेको जनाइएको छ ।
विष्टको हिजो विहान ९ बजे घरमै निधन भएको र बेलुका ६ बजेतिर प्रहरी र मेडिकल टिम आएर शव लगेको पारिवारिक श्रोतले जानकारी दिएको छ ।
मुस्तांग किदुगको पूर्व अध्यक्ष नोर्बु बिष्टका अनुशार सुरुमा टाउको दुख्ने र स्वास फेर्न गाह्रो हुने समस्या भएपछि बिष्ट सीटीएमडीमा उपचारका लागि गएका थिए । त्यसपछि उनलाई घरमै आराम गरेर बस्न भनिएको थियो । कहिले राम्रो हुने कहिले स्थीति एकदम नराम्रो हुने गरेकोमा अस्ती बेलुका खाना समेत खान नसकेको जनाइएको छ ।
सीटीएमडीले घरमै बस्न भनेपछि बिष्ट माउन्ट साइनाई अस्पतालमा समेत गएका थिए । अस्पतालले एक्सरे गरेपछि फोक्सोमा समस्या रहेको बताएको थियो । तर अस्पतालले भर्ना लिन नमानी घरमै आराम गर्न भनेको र केहीदिनमा रिपोर्ट दिने बताएको थियो । रिपोर्ट नआउँदै बिष्टको निधन भएको छ । बिष्ट मुस्ताङका राजाका समेत नजिकका आफन्त हुन् ।
बिष्ट ४८ बर्षका थिए । बिष्टका दुईवटा छोरा र श्रीमति काठमाडौंमा बस्दै आएका छन् । बिष्ट २० बर्षदेखि अमेरिकामा बस्दै आएका थिए भने र अमेरिका आएदेखि नै कागजपत्र नभएका नेपाल फर्कन सकेका थिएनन् । छेपक दोर्जे गुरुङले भने – ‘कागजपत्र नभएका कारण सधैका लागि नेपाल जाने बताउँदै थिए । दुईसाता अगाडिमात्र मेरो भेटघाट भएको थियो । परिवारलाई भेट्नै नपाई बिते ।’
बिष्टको मृत्यु कोरोनाले भएको हो वा अन्य कारणले भन्ने थप रिपोर्ट आउन बाँकी छ । केहीदिनपछिमात्र शव समुदायले दाहसंस्कार गर्ने वा अस्पतालले गर्नेभन्नेबारे टुंगो लाग्ने राजकुमार बिष्टले जनाएका छन् । उनले यो घडीमा संयम रहन सबैलाई अनुरोध गरेका छन् ।
यसैबीच मुस्ताङ घर भई न्युयोर्कको क्वीन्स जमैकामा बस्ने सोनाम लामाको पनि मृत्यु भएको नुप्री एसोसिएसनका पूर्व अध्यक्ष मिङमार लामाले जानकारी दिनुभयो ।
सोनाम अन्दाजी ४० बर्षका रहेका थिए भने उनको मृत्यु बस्दै आएको कोठाभित्रै भएको जनाइएको छ । जमैकामा एक्लै बस्दै आएका उनी केही दिनदेखि बिरामी रहेको बताइएको छ ।
केशवराम राईका अनुशार फोन सम्पर्क गर्दा सम्पर्क नभएपछि उनी बसेको स्थानमा गएर हेर्दा उनी मृत अवस्थामा भेटिएका थिए । काम गर्ने स्थानको साहुले फोन गर्दा नउठाएपछि घरमा गएर हेर्दा मृत अवस्थामा भेटिएका थिए ।
उनको मृत्यु कोरोना संक्रमणकै कारण भएको अनुमान गरिएपनि रिपोर्ट आउन भने बाँकी रहेको छ ।
झण्डै १८ बर्षदेखि अमेरिकामा बस्दै आएका सोनामको परिवार नेपालमा रहेको जनाइएको छ । उनको शव प्रहरीले लगेर गएको र उनका कुनै आफन्तहरु अमेरिकामा नभएका कारण त्यसपछि अवस्था अज्ञात रहेको छ ।
केहीदिन अगाडिमात्र न्युयोर्कको एल्महस्र्ट अस्पतालमा कोरोना संक्रमणका कारण अनिल लिम्बुको मृत्यु भएको थियो । ५० बर्षका लिम्बुको आफन्तको उपस्थीतिविनै दाहसंस्कार गरिएको थियो ।
यो समाचार थप विवरणहरु सहित अपडेट गरिएको छ ।- सम्पादक