सेन्ससका बेलामा हुनसक्ने ठगीबाट बच्न अधिकारको अपिल, नेपाली भाषामा भिडियो सार्वजनिक
प्रकाशित मिति : चैत्र २, २०७६ आईतबार
अमेरिकामा नेपाली लगायतका आप्रवासी समुदायको अधिकारका लागि सकृय संस्था अधिकारले अमेरिकी जनगणनाका बेलामा ठगहरु सकृय हुनसक्ने भएकाले त्यसबाट सचेत रहन आग्रह गरेको छ । जनगणनाका बेलामा ठगहरुले नक्कली फोनकल र पत्रहरु पठाएर सोसल सेक्युरिटी र बैंक विवरणहरु माग्नसक्ने भएकाले त्यसबाट सचेत हुन आग्रह गरिएको हो ।
आज आयोजित कन्फ्रेन्स कल पत्रकारसम्मेलनमा अधिकारकी आयोजन तथा कार्यक्रम निर्देशक नर्बदा क्षेत्रीले सकभर अनलाइनबाट सेन्ससको फारम भर्न अनुरोध गर्नुभयो । सेन्ससको कोडसहित प्राप्त पत्रका आधारमा सेन्ससको वेवसाइटमा गएर उक्त फर्म भर्न सकिने व्यवस्था रहेको छ ।
अप्रिल १ तारिखसम्म पनि अनलाइनमा नभरेको खण्डमा सरकारले कागजी फर्म पठाउनसक्ने र जनगणना गराउने व्यक्तिहरु घरघरमा आउनसक्ने भएकाले अहिलेको अवस्थामा सकभर अनलाइनमार्फत नै भर्न उहाँले सुझाव दिनुभएको हो । उहाँले भन्नुभयो – ‘जनगणनाका नाममा कसैले बैंकको सुचना वा सोसल सेक्युरिटी नम्बर मागेमा नदिनुहोला । जनगणनाका लागि त्यस्ता विवरणहरु दिनुपर्दैन । ठगहरुको फन्दामा पर्नबाट जोगिनुहोला ।’
जनगणनामा भरिने विवरणहरु सेन्सस ब्यूरोले अरु एजेन्सीहरुलाई नदिने र अरु एजेन्सीहरुलाई दिनका लागि कानुनले समेत रोकेका कारण जनगणनामा कागजपत्रविहिनदेखि सबैजना सहभागी हुन अधिकारका तर्फबाट सेन्ससको प्रबन्धक माया गुरुङले अनुरोध गर्नुभयो । कसैले सेन्ससको विवरण अन्यत्र शेयर गरेमा जेल र जरिवानाको समेत व्यवस्था भएकाले कागजपत्रविहिनदेखि जुनसुकै अध्यागमन स्टाटसमा रहेकाहरुलाई ढुक्क भएर सेन्ससमा सहभागी हुन आग्रह गर्नुभयो ।
सन् २०१० को जनगणनामा कैयन नेपालीहरुले सहभागिता नजनाउँदा नेपालीको जनसंख्या वास्तविक भन्दा कम देखिएकाले यसपटक त्यसो हुन नदिन सबै नेपालीहरु सचेत हुनुपर्ने माया गुरुङले बताउनुभयो । आफूहरुले जनगणनाबारे सचेतनाका लागि नेपाली र तिब्बती भाषामा फ्लायर र पोष्टरहरु बनाएको उहाँले जानकारी दिनुभयो ।
अधिकारले विगतमा नेपाली समुदायमाझ भर्न लगाएको प्रतिज्ञापत्र सेन्सस फारम नभएका कारण त्यो प्रतिज्ञा फारम भरेकाहरुले पनि जनगणनाको फारम भर्नुपर्ने अनिल शाहीले बताउनुभयो । उहाँले भन्नुभयो – ‘कतिपयलाई प्रतिज्ञा कार्ड भर्दा सेन्सस भरेको भन्ने भ्रम परेको रहेछ । अधिकारले भरेको प्रतिज्ञापत्र जनगणना होइन । त्यो केवल जनगणनाका बेलामा अलर्ट पठाउन र जनगणनामा सहभागी हुनका लागि आब्हान गर्नका लागिमात्र भरिएको हो ।’
अधिकारले जनगणनाबारे सचेतना जगाउन नेपाली भाषामा भिडियो समेत निर्माण गरेको छ । सेन्ससको आधिकारिक भिडियो नेपाली भाषामा बनाइएको र यसबाट नेपाली समुदायमा सही सुचना पुग्ने अधिकारले विश्वास लिएको छ ।
मार्च १२ बाट अमेरिकामा जनगणना सुरु
मार्च १२ बाट अमेरिकामा जनगणना सुरु भएको छ । विगतका जनगणनामा अमेरिकामा रहेका धेरै नेपालीहरुले भाग नलिएका कारण अमेरिकाको आधिकारिक तथ्यांकमा नेपालीहरुको संख्या कम देखिएको छ , जसका कारण नेपालीहरुले कैयन सरकारी सुविधा र साधन श्रोतमा पहुच प्राप्त गर्न सकेका छैनन् ।
विभिन्न सुविधा र साधन श्रोतमा पहुच स्थापनाका लागि नेपाली समुदायलाई जनगणनामा सहभागी हुन अनुरोध गरिएको छ । यो वेवसाइटमा गएर विभिन्न प्रश्नहरुको जवाफ दिएर जनगणनामा सहभागी हुन सकिनेछ ।
जनगणनामा सहभागी हुन यहाँ क्लिक गर्नुहोस् ।
सयौं बिलियन डलरको संघीय फण्डको उचित हिस्सा न्युयोर्क सिटीले प्राप्त गर्ने सुनिश्चितताका लागि जनगणनामा भाग लिन न्युयोर्कबासीहरुलाई मेयर बिल डे ब्लाजिओले आव्हान गरेका छन् । जतिधेरै न्युयोर्कबासीले जनगणनामा सहभागिता जनाउँछन्, त्यती नै धेरै शिक्षा, स्वास्थ्य, आवास, बाटोघाटो र पुल निर्माण लगायतका क्षेत्रमा न्युयोर्क सिटीले संघीय रकम प्राप्त गर्नेछ । किनभने यो बजेट जनसंख्याका आधारमा निर्धारण गरिन्छ ।
1-844-330-2020 नम्बरमा फोन सम्पर्क गरेर पनि जनगणनामा सहभागिता जनाउन सकिनेछ । मार्च १२ पछि मे महिनाको मध्यसम्म जनगणना चल्नेछ । जुनसुकै अध्यागमन स्टाटस भएकाहरुलाई पनि जनगणनामा सहभागिता जनाउन आब्हान गरिएको छ । सेन्सस फर्ममा नागरिकता वा अध्यागमन स्टाटसबारे प्रश्न नभएकाले ढुक्कसँग सहभागी हुन आव्हान गरिएको छ । साथै जनगणनाको विवरण सरकारका अध्यागमन कार्यान्वयन निकायलाई प्रदान गर्न वर्जित गरिएको छ ।
कानुन अनुशार जनगणना जानकारी मात्र तथ्याकीय उद्देश्यको लागि प्रयोग गर्न सकिन्छ । कुनै पनि तरिकामा एक व्यक्ति वा परिवारको विरूद्ध प्रयोग गर्न नपाउने कानुन रहेको छ । जनगणना ब्यूरोले कुनै पनि सरकारी एजेन्सीहरू, निजी व्यक्तिहरू वा कम्पनीहरूसँग व्यक्तिगत जानकारी साझेदारी गर्दैन ।
जनगणना ब्यूरोले अध्यागमन कानुन कार्यान्वयन निकायहरु, अन्य कानुन कार्यान्वयन निकायहरु, अरु कुनै संघीय, राज्य, वा शहर एजेन्सीहरू र घर मालिकहरूलाई यस्तो विवरण प्रदान गर्दैन ।
जनगणना के हो?
जनगणनाले संयुक्त राज्य अमेरिकामा बसोबास गर्ने हरेक वयस्क, शिशु र बच्चालाई गिन्ती गर्छ। यो गणना हरेक दश वर्षमा सरकारी निकाय अर्थात यु.एस. जनगणना ब्यूरोद्वारा गरिन्छ ।
हरेक घरका एकजना व्यक्तिले अनलाइनबाट वा फोन वा हुलाकबाट जनगणना पूरा गर्नुपर्छ। नयाँ जन्मिएका, साना बालबालिका र धेरै जसो आफूसँग सुत्ने साथी वा परिवार सदस्यहरू सहित आफ्नो ठेगानामा बस्ने सबैजनालाई गिन्ती गर्नुहोस्।
यदि स्थायी ठाउँ नभएको र अप्रिल १, २०२० देखि यहाँ बस्ने कोही व्यक्ति हुनुहुन्छ भने, उक्त व्यक्तिलाई पनि गिन्ती गर्नुहोस्।
यो किन महत्त्वपूर्ण छ ?
जनगणनाले महत्त्वपूर्ण डाटा उपलब्ध गराउँछ जसले तपाईंको जीवनको विभिन्न पक्षहरूलाई आकार दिन्छ। कानूननिर्माता, व्यवसायको मालिक, शिक्षक र अन्य धेरैले तपाईंको समुदायमा सेवा, उत्पादन र सहायता उपलब्ध गराउन यो डाटालाई दैनिक प्रयोग गर्दछन्।
हरेक वर्ष, सेवा, जनगणनाका डाटाका आधारमा करोडौं डलरका संघीय कोषहरू अस्पताल, अग्नी विभाग, विद्यालय, सडक र अन्य स्रोतहरूमा खर्च गरिएको हुन्छ। जनगणनाको डाटाले कंग्रेसमा हुने हरेक सिटको निर्धारण गर्छ र तिनीहरूलाई मतदानका जिल्लाहरूका सीमाहरू कोर्न प्रयोग गरिन्छन्। जनगणना गर्ने कार्य संयुक्त राज्य अमेरिकाको संविधानद्वारा पनि आवश्यक छ: धारा १ को उपधारा २ मा संयुक्त राज्य अमेरिकाले हरेक दश वर्षमा आफ्नो जनगणना गर्छ भनिएको छ। पहिलो गणना सन् १७९० मा भएको थियो।
गोपनीयता र सुरक्षा
तपाईंले उपलब्ध गराउनु हुने जवाफहरू तथ्याङ्कहरू निर्माण गर्न प्रयोग गरिन्छ। कानूनद्वारा जनगणना ब्यूरोले तपाईंका जवाफहरू सुरक्षित गर्न र तिनीहरूलाई कडा गोपनीयताका साथ राख्न आवश्यक पर्छ। वास्तवमा सबै कर्मचारी तपाईको व्यक्तिगत जानकारीलाई जीवनकालभर संरक्षण गर्न शपथ खाएका हुन्छन्।
यु. एस. संहिताको शीर्षक १३ मा, जनगणना ब्यूरोले तपाईं, तपाईंको घर वा तपाईंको व्यवसायलाई पहिचान गर्न सकिने कानकारी कसैलाई पनि अर्थात कानून प्रवर्तन निकायहरूलाई पनि खुलासा गर्न सक्दैनन्। कानूनले तपाईंको डाटा संरक्षित गरिन्छ र तपाईंका डाटालाई सरकारी निकाय वा अदालतद्वारा तपाईंका विरुद्ध प्रयोग गर्न सक्दैनन् भनी सुनिश्चित गरेको छ।