कलाकार दिक्पाल कार्कीले आफ्नो जन्मदिनमा दिए उद्दार गरिएकालाई उपहार
प्रकाशित मिति : फाल्गुन १८, २०७६ आईतबार
जन्मदिनमा अब जन्मदिन भएको व्यक्तिले उपहार लिने चलन पुरानो हुन लागिसकेको छ । विस्तारै जन्मदिनमा परोपकारी कार्य गरेर जन्मदिन मनाउने चलन विकाश हुँदै गएको छ । कलाकार तथा मिस्टर मोडल अफ द वल्र्ड २०१८ दिक्पाल कार्कीले यस्तो परोपकारी कार्य गरेर आफ्नो जन्मदिन मनाएका छन् ।
उनी आफ्नो जन्मदिनमा विभिन्न खाद्यसामाग्रीहरु उपहार बोकेर ललितपुरको कुसुन्ती हाइटमा रहेको नेपाल स्नेही काखमा पुगे, जहाँ सडकबाट उद्दार गरिएका ६० जनाभन्दा धेरैलाई संरक्षण प्रदान गरिएको छ । मानसिक सन्तुलन गुमाएका, विक्षिप्त भएका, सडकमा अलपत्र परेकाहरुलाई यो संस्थाले उद्दार गरेर संरक्षण प्रदान गर्दै आएको छ , जसमा कैयन बालबालिकासमेत छन् ।
त्यहाँ पुगेर उनले दिक्पालले उद्दार गरिएकाहरुमाझ जन्मदिनमात्र मनाएनन्, उनीहरुलाई केक समेत खुवाए । जन्मदिन मनाउने क्रममा दिक्पाल निकै भावुक समेत भएका थिए । पहिलोपटक आश्रममा जन्मदिन मनाउन पाउँदा आफू खुशी र भावुक भएको दिक्पालले खसोखासलाई बताए । दिक्पाल उक्त आश्रममा यसअगाडि पनि विभिन्न सहयोग सामाग्रीहरु लिएर पुग्ने गरेका थिए ।
दिक्पालले अहिलेसम्म झण्डै एकसय म्युजिक भिडियोमा अभिनय गरिसकेका छन् । विभिन्न राष्ट्रिय र अन्तर्राष्ट्रिय ब्राण्डहरुका लागि समेत अभिनय गरेका उनले विभिन्न राष्ट्रिय अन्तर्राष्ट्रिय शोहरुमा मोडलिङ गरेका छन् ।
यो आश्रम कैयन म्युजिक भिडियोमा अभिनय गरिसकेकी रंगकर्मी श्रीनेहा पोखरेलले संचालन गरिरहेकी छिन् । उनले १० बर्षदेखि नेपाल स्नेही काख संचालन गर्दै आएकी छिन् । उनले म्युजिक भिडियो, टेलिचलचित्र, नाटक लगायतबाट प्राप्त पारिश्रमिकको अंशसमेत यसैमा खर्चदै आएकी छिन् ।