विद्यार्थी भिसावाहकलाई विगतको गैरकानुनी उपस्थीति पत्ता लागेको आधारमा प्रतिबन्ध नलाग्ने
प्रकाशित मिति : माघ २६, २०७६ आईतबार
अमेरिकामा विद्यार्थी भिसामा आएर गैरकानुनी उपस्थीति हुनेलाई संघीय अदालतको स्थायी आदेशले राहत प्रदान गरेको छ । संघीय न्यायाधिसले एक स्थायी आदेश जारी गर्दै गैरकानुनी उपस्थीतिको गणनाबारे ट्रम्प प्रशासनले ल्याएको कडा नियमलाई खारेज गरिदिएका हुन् ।
अमेरिकामा एफ, जे र एम भिसमा आउनेहरुले भिसाको उल्लंघन गरेकै दिनदेखि गैरकानुनी उपस्थीति गणना हुने नयाँ नियम ट्रम्प प्रशासनले ल्याएको थियो । यसअगाडि एफ, एम र जे भिसामा आउनेहरुले भिसाको उल्लंघन गरेतापनि उनीहरुको गैरकानुनी उपस्थीति भिसाको उल्लंघन गरेको दिनदेखि नभई युएससीआईएसले वा अध्यागमन न्यायाधिसले पत्ता लगाएर ठहर गरेको दिनदेखिमात्रै गणना हुने नियम रहेको थियो ।
उल्लंघन गरेको दिनदेखि नभई युएससीआईएसले वा अध्यागमन न्यायाधिसले पत्ता लगाएर ठहर गरेको दिनदेखिमात्रै गणना हुने पूरानै नियम लागु हुनेगरी यसअगाडि अदालतले अस्थायी आदेश जारी गरेको थियो । तर अहिले अदालतले स्थायी आदेश नै जारी गरेको छ । विभिन्न विश्वविद्यालयहरु र दुईजना व्यक्तिले गैरकानुनी उपस्थीतिबारेको ट्रम्प प्रशासनले ल्याएको नयाँ नियमबिरुद्ध अदालतमा मुद्दा दायर गरेका थिए ।
अमेरिकामा गैरकानुनी उपस्थीतिको गणनाबारेको नियमले व्यक्तिमाथि अमेरिकामा लाग्ने प्रतिबन्धको निर्धारण गर्दछ । यदि कुनै व्यक्तिको उपस्थीति १८० दिनभन्दा धेरै छ भने उसलाई अमेरिकामा ३ बर्षसम्मको प्रतिबन्ध लाग्छ भने एकबर्षभन्दा धेरै छ भने १० बर्षसम्मको प्रतिबन्ध लाग्छ । यो अवधिभर आप्रवासीलाई अमेरिका प्रवेश गर्न वा अमेरिकी भिसाका लागि आवेदन दिन प्रतिबन्ध लाग्ने नियम रहेको छ ।
ट्रम्प प्रशासनको नियम लागु भएको भए एम, एफ र जे भिसामा अमेरिकामा आएको व्यक्तिले यदि दुईबर्ष अगाडि भिसाको उल्लंघन गरेको अहिले पत्ता लागेको खण्डमा उसलाई १० बर्षसम्मको प्रतिबन्ध लाग्न सक्थ्यो । तर यो नियम लागु हुनमा रोक लागेकाले एम, एफ र जे भिसामा अमेरिकामा आएको व्यक्तिले यदि दुईबर्ष अगाडि भिसाको उल्लंघन गरेको अहिले पत्ता लागेको खण्डमा पत्ता लागेको दिनदेखिमात्र उसको गैरकानुनी उपस्थीतिको गणना हुनेछ । तत्काल तीनबर्ष वा १० बर्षको प्रतिबन्ध लाग्दैन ।
यसो हुँदा उनीहरुलाई स्टाटस परिवर्तन गर्न वा अमेरिका छाड्न विना कुनै प्रतिबन्ध ६ महिनाको अवधि प्राप्त हुनेछ । उनीहरुले गैरकानुनी उपस्थीतिको दिन १८० दिन नकटाएको खण्डमा भविश्यमा भिसा आवेदन दिनका लागि कुनै असर पर्नेछैन ।
अदालतको यो आदेशबिरुद्ध ट्रम्प प्रशासनले पुनरावेदन गर्ने अनुमान गरिएको छ ।
