गणेश थापाको आत्मकथा अर्कोबर्ष : ‘दरबारले भनेको नमान्दा पदबाटै हटाइयो’
प्रकाशित मिति : माघ १७, २०७६ शुक्रबार
अल नेपाल फुटवल एसोसिएसन नेपाल एन्फाका पूर्व अध्यक्ष गणेश थापाले आफ्नो जीवनकालका विभिन्न उतारचढावलाई समेटेर आत्मकथा प्रकाशित गर्ने भएका छन् । दरवारबारे भनेको मान्छे नराख्दा पदच्युत हुनुपरेका घटनादेखि माओवादी जनमुक्ति सेनालाई खेलमा समावेश नगर्दाका परिघटनासम्म आत्मकथामा समेट्ने थापाले जानकारी दिएका छन् ।
एसियन फुटवल कन्फेडेरेशनका पूर्व अध्यक्ष मोहम्मद बिन हम्मामबाट १ लाख डलर रकम लिएपछि फिफाबाट १० बर्षे प्रतिबन्धमा परेका थापा झण्डै २० बर्षसम्म एन्फाको अध्यक्ष भएका थिए । आफूले मोहम्मद बिन हम्मामबाट उपहारस्वरुप उक्त रकम प्राप्त गरेको तथा हम्माम र आफू पदबाट हटेपछि पनि त्यो भन्दा ठूलो रकम उपहारस्वरुप प्राप्त गरेको थापाले खुलासा गरेका छन् ।
एन्फामा ५८ करोड भ्रष्टाचारको आरोप लगाएर आफूबिरुद्ध षड्यन्त्र गरिएको र पूर्वाग्रह राखिएको गुनासो गर्दै थापाले आफूलाई अख्तियारले सफाई दिंदासमेत भ्रष्टाचारीको आरोप लगाइरहँदा आफ्नो चित्त दुखेको बताएका छन् । उनले बन्द गरिएको फाइल खोलेर पुन अनुसन्धान गर्दा आफू दोषी देखिएमा सजाय भोग्न तयार रहेको बताएका छन् ।
पुस्तकमा आफूबिरुद्ध भएका षड्यन्त्रमात्र नभई आफूले गरेका कमजोरीबारे पनि विशेष खुलासा गर्ने थापाले बताए । उनले आफ्नो पुस्तकमा आफ्नैबारेमामात्र बढाई चढाई नहुने र आत्मस्वीकृति समेत हुने जानकारी दिएका छन् । पुस्तक अबको ६ महिनाभित्र प्रकाशित भइसक्ने उनको भनाई छ ।
यस अगाडि आत्कथाको आवरण सार्वजनिक गर्न आयोजित एक कार्यक्रममा उनले आत्मकथामा आफूले लेखेका कुराहरुलाई क्रस चेक गरेर असत्य ठहरिए हटाइदिन प्रकाशकलाई अधिकार दिएको बताएका थिए । प्रकाशक बुक हिल्स पब्लिकेशनले पनि थापाको लेखनीलाई प्रमाणका आधारमा भेरिफाई गरेर मात्र छापिने बताएको थियो ।
करिब ९० हजार शब्दको आत्मकथा ‘गणेश थापा’ यही फागुनमा सार्वजनिक हुने बताइएपनि थापाको स्वास्थ्यमा समस्या आएका कारण प्रकाशन केही ढिलो हुने भएको छ । किताबमा थापाको खेलाडी जीवन, एन्फामा आएपछि गरेको काम, विवाद लगायतका विषय समावेश छन् ।