अघिल्लो बर्षको तुलनामा अमेरिकाको भिजिटर भिसा अस्वीकृतहुने नेपालीको प्रतिशतमा कमी
प्रकाशित मिति : माघ १६, २०७६ बिहीबार
आर्थिक बर्ष २०१९ मा नेपालीका लागि अमेरिकाको भिजिटर भिसा अस्वीकृत दर ५० दशमलव ७० प्रतिशत रहेको अमेरिकी सरकारको विदेशमन्त्रालय अन्तरगत ब्यूरो अफ कन्सुलर अफेयर्सले जनाएको छ । अर्थात् भिजिटर भिसाका कुल नेपाली आवेदकमध्ये ४९ दशमलव ३० प्रतिशतले भिसा प्राप्त गर्न सफल भएका छन् ।
आर्थिक बर्ष २०१८ को तुलनामा २०१९ मा भिजिटर भिसा अस्वीकृत दर केही कम भएको छ । आर्थिक बर्ष २०१८ मा नेपालीको भिजिटर भिसा अस्वीकृत दर ५१ दशमलव ५३ प्रतिशत रहेको थियो ।
सन् २०१७ मा भने अस्वीकृत दरको तुलनामा स्वीकृत दर उच्च रहेको थियो । सन् २०१७ मा आवेदकमध्ये कुल ५३ दशमलव ५८ प्रतिशतले बी भिसा प्राप्त गरेका थिए । आर्थिक बर्ष २०१६ मा पनि कुल नेपाली आवेदकहरुमध्ये भिसा नपाउनेको तुलनामा पाउनेहरुको संख्या बढी थियो ।
काठमाडौंमा रहेको अमेरिकी दूतावासले आर्थिक बर्ष २०१९ मा १४ हजार ६ सय १४ जनालाई भिजिटर भिसा जारी गरेको छ । उक्त आर्थिक बर्षको पहिलो महिना अक्टोबरमा ८८०, दोश्रो महिना नोभेम्बरमा ९०८ र तेश्रो महिनामा डिसेम्बरमा ९९९ जनालाई काठमाडौं दूतावासले बी भिसा जारी गरेको थियो ।
त्यस्तै सन् २०१९ को जनवरीमा ८७५, फरबरीमा ८९३, मार्चमा १३९०, अप्रिलमा १९६९, मेमा १८२८, जुनमा १४०८, जुलाईमा १२९८, अगस्तमा ११३५, सेप्टेम्बरमा १०३१ जनालाई काठमाडौं दूतावासले बी भिसा जारी गरेको थियो ।
१८ हजार २ सय ७ जनालाई गैरआप्रवासी भिसा
आर्थिक बर्ष २०१९ को अवधिमा काठमाडौंमा रहेको अमेरिकी दूतावासले १८ हजार २ सय ७ जनालाई गैरआप्रवासी भिसा जारी गरेको छ । जुन गतबर्षको तुलनामा ७९२ ले बढी हो । आर्थिक बर्ष सन् २०१८ मा काठमाडौंमा रहेको अमेरिकी दूतावासले १७ हजार ४ सय १५ गैरआप्रवासी भिसा जारी गरेको थियो ।
काठमाडौंमा रहेको अमेरिकी दूतावासले आर्थिक बर्ष सन् २०१७ मा २१ हजार ८ सय ९३, सन् २०१६ मा २३ हजार ६ सय ७, सन् २०१५ मा १९ हजार ४९, सन् २०१४ मा १२ हजार ४ सय ४२, सन् २०१३ मा ९ हजार २ सय ४७, सन् २०१२ मा ८ हजार ४ सय ३८, सन् २०११ मा ८ हजार ३७ र सन् २०१० मा ८ हजार २ सय ७७ गैरआप्रवासी भिसा जारी गरेको थियो ।
१० बर्षको अवधिमा काठमाडौंमा रहेको अमेरिकी दूतावासले १ लाख १ हजार ४६ हजार ६ सय १२ गैरआप्रवासी भिसा जारी गरेको छ । आर्थिक बर्ष सन् २०१९ मा भने विश्वभरबाट अमेरिकाले ८७ लाख ४२ हजार ६८ गैरआप्रवासी भिसा जारी गरेको छ । जुन विगत ४ बर्षको तुलनामा सबैभन्दा कम हो ।
दक्षिण एसियामा सबैभन्दा धेरै भने भारतमा रहेका दूतावास र कन्सुलेटहरुबाट गैरआप्रवासी भिसा जारी गरिएको छ ।