सांसद मनाङ्गे ६ हजार धरौटीमा रिहा
प्रकाशित मिति : माघ १२, २०७६ आईतबार
गण्डकी प्रदेशका सांसद राजीव गुरुङ उर्फ दीपक मनाङ्गे ६ हजार रुपैयाँ धरौटीमा रिहा भएका छन् । अखिल नेपाल फुटबल संघ (एन्फा) कास्की अध्यक्ष मिलन गुरुङलाई दुर्व्यवहार गरेको आरोपमा पक्राउ परेका सांसद मनाङ्गेलाई आइतबार जिल्ला प्रशासन कार्यालय कास्कीले ६ हजार रुपैयाँ धरौटीमा छाडेको हो ।
यसअघि कार्यालयले मनाङ्गेलाई २ दिन थुनामा राखेर अनुसन्धान गर्न प्रहरीलाई अनुमति दिएको थियो । गत मंगलबारदेखि पोखरामा सुरु भएको मुख्यमन्त्री कप उद्घाटन कार्यक्रममा प्रतियोगिताको व्यवस्थापनप्रति असन्तुष्टि जनाउँदै सांसद मनाङेले एन्फा अध्यक्ष गुरुङलाई झापड हानेका थिए । त्यसको भोलीपल्ट बुधबार एन्फा अध्यक्ष गुरुङले मनाङेविरुद्ध किटानी जाहेरी दिएपछि मनाङ्गे बिहीबार पोखराको लेकसाइडको होटलबाट पक्राउ परेका थिए ।