अमेरिकन नागरिकको भन्दा ग्रिनकार्डवाहकका छोराछोरीको ग्रिनकार्ड छिटो
प्रकाशित मिति : माघ ११, २०७६ शनिबार
केही महिनादेखि अमेरिकन नागरिकहरुको तुलनामा ग्रिनकार्डवाहकका २१ बर्ष भन्दा माथिका अविवाहित छोराछोरीहरुको ग्रिनकार्ड छिटो प्राप्त भइरहेको छ । फरबरीको भिसा बुलेटिन अनुशार अमेरिकी नागरिकको तुलनामा ग्रिनकार्डवाहकका २१ बर्ष भन्दा माथिका अविवाहित छोराछोरीहरुको ग्रिनकार्ड एकबर्ष छिटो प्राप्त भइरहेको छ ।
फरबरीमा अमेरिकन नागरिकका २१ बर्ष भन्दा माथिका अविवाहित छोराछोरीहरुको ग्रिनकार्डका लागि फाइनल एक्सन मिति सन् २०१३ को अगस्त २२ छ । तर ग्रिनकार्डवाहकका २१ बर्ष भन्दा माथिका अविवाहित छोराछोरीहरुको ग्रिनकार्डका लागि फाइनल एक्सन मिति सन् २०१४ को अगस्त २२ छ ।
फरबरीको भिसा बुलेटिन पढ्न यहाँ क्लिक गर्नुहोला ।
यसरी हेर्दा ग्रिनकार्डवाहकका २१ बर्ष भन्दा माथिका अविवाहित छोराछोरीका सन्दर्भमा साढे ५ बर्ष र नागरिकका २१ बर्ष भन्दा माथिका अविवाहित छोराछोरीका सन्दर्भमा साढे ६ बर्ष लाग्ने भएको छ ।
छिटो अमेरिकन नागरिकता लिएर २१ बर्ष माथिका छोराछोरीहरुलाई छिटो अमेरिका ल्याउन चाहनेहरुलाई भने यसले निराश तुल्याएको छ । तर २१ बर्ष माथिका छोराछोरीहरुलाईलाई अमेरिका ल्याउन चाहने ग्रिनकार्डवाहकहरु भने केही खुशी भएका छन् ।
ग्रिनकार्डवाहकका २१ बर्षभन्दा कम उमेरका छोराछोरीको सन्दर्भमा समेत केही महिनादेखि भिसा करेन्ट रहदै आएकाले अमेरिकी नागरिकका २१ बर्ष मुनीका छोराछोरी र ग्रिनकार्डवाहकका २१ बर्ष मुनीका छोराछोरीका सन्दर्भमा समेत उस्तै समय लाग्ने गरेको छ । यो क्याटेगोरीमा समेत अझ कतिपयको सन्दर्भमा त नागरिकको तुलनामा ग्रिनकार्डवाहकको आवेदनमा छिटो ग्रिनकार्ड प्राप्त भएका उदाहरण समेत छन् ।
फरबरी भिसा बुलेटिन अनुशार अमेरिकी नागरिकका विवाहित छोराछोरीहरुका लागि भने झण्डै साढे १२ बर्ष लाग्ने गरेको छ । जबकी अमेरिकी नागरिकता प्राप्त व्यक्तिका दाजुभाई दिदीबहिनीकाहरुका लागि समेत यो अवधि झण्डै साढे १३ बर्ष रहेको छ ।
अमेरिकी नागरिकका विवाहित छोराछोरी र दाजुभाई दिदीबहिनीलाई ग्रिनकार्ड प्राप्त हुन लाग्ने समय लगभग उस्तै हुँदा कैयन अमेरिकन नागरिकलाई यसले निराश तुल्याएको छ ।