दीपक मनाङ्गेविरुद्ध उजुरी दिने मिलन गुरुङ पक्राउ
प्रकाशित मिति : माघ १०, २०७६ शुक्रबार
सांसद दीपक मनाङ्गेविरुद्ध उजुरी दिने मिलन गुरुङलाई प्रहरीले पक्राउ गरेको छ । बैंकिङ कसूरमा अनुसन्धान गर्न उनलाई पक्राउ गरिएको जिल्ला प्रहरी कार्यालय कास्कीका डीएसपी राजकुमार केसीले जानकारी दिए ।
कुटपिट गरेको आरोपमा पक्राउ परेका मनाङेलाई भने जिल्ला प्रशासन कार्यालय कास्कीले दुई दिन हिरासतमा राखेर अनुसन्धान गर्न प्रहरीलाई अनुमति दिएको छ । मंगलबारदेखि पोखरामा सुरु भएको मुख्यमन्त्री कप उद्घाटन कार्यक्रममा प्रतियोगिताको व्यवस्थापनप्रति असन्तुष्टि जनाउँदै सांसद मनाङेले एन्फा अध्यक्ष गुरुङलाई झापड हानेका थिए ।
एन्फा अध्यक्ष गुरुङले बुधबार मनाङेविरुद्ध किटानी जाहेरी दिएपछि मनाङे पोखराको लेकसाइडको होटलबाट बिहीबार पक्राउ परेका थिए ।