सातदेशमाथिको अमेरिकी भिसा प्रतिबन्ध सोमबारदेखि, सुचीमा म्यान्मारसमेत


प्रकाशित मिति : माघ ८, २०७६ बुधबार

अमेरिकी संचारमाध्यमहरुले अमेरिकाले भिसा प्रतिबन्ध लगाउने योजना बनाएका ७ देशका नामहरु सार्वजनिक गरेका छन् । अमेरिकाले म्यानमारसहित बेलारुस, इरिटेरिया, किर्गिस्तान, नाइजेरिया, सुडान र तान्जिनियामाथि भिसा प्रतिबन्ध लगाउन लागेको समाचारहरुमा जनाइएको छ ।

अमेरिकी सरकारले थप ७ देशमाथि भिसा प्रतिबन्ध लगाउने तयारी गरेको अमेरिकी राष्ट्रपति डोनाल्ड ट्रम्पले नै पुष्टी गरेका छन् । उनले मंगलबार वाल स्ट्रीट जर्नलसँगको अन्तरवार्ताका क्रममा थप देशहरुमाथि अमेरिकी भिसा प्रतिबन्ध लगाउन लागिएको खुलासा गरेका छन् ।

ती देशहरुबाट डिभी लोटरीमा अमेरिका आउनसमेत प्रतिबन्ध लगाउन सकिने जनाइएको छ । राष्ट्रपति ट्रम्पले सुरुदेखि नै डिभी लोटरीको विरोध गर्दै आएका छन् । ट्रम्पले स्वीट्जरल्याण्डको डाभोसमा विश्व आर्थिक मञ्चको कार्यक्रम लगत्तै ती देशहरुको सुची सार्वजनिक गर्ने अपेक्षा गरिएको छ ।

नयाँ प्रतिबन्ध आगामी सोमबारदेखि लागु हुने जनाइएको छ । सोमबार ट्रम्पले सुरुमा घोषणा गरेको यात्रा प्रतिबन्धको बार्षिकी समेत हो ।

ट्रम्प प्रशासनले थप ७ देशमाथि यात्रा प्रतिबन्ध लगाउन ड्राफ्ट तयार गरिसकेको जनाइएको छ । अत्यन्तै आलोचित यात्रा प्रतिबन्धको सुचीमा अरु देशहरुलाई थप्ने ड्राफ्ट तयार भएको भनिएपनि सार्वजनिक भने गरिएको छैन ।

सन् २०१८ मा ट्रम्पको बहुचर्चित र विवादित यात्रा प्रतिबन्धको तेश्रो संस्करणलाई सर्वोच्च अदालतले अनुमोदन गरेको थियो ।

पुरानो यात्रा प्रतिबन्धको सुचीमा लिबिया, इरान, सोमालिया, सिरिया, यमन, भेनेजुएला र नर्थ कोरिया रहेका छन् । चाडलाई गत अप्रिलमा सुचीबाट हटाइएको थियो । उक्त देशले अमेरिकी सुरक्षा मापदण्ड पूरा गरेको भन्दै सुचीबाट हटाइएको थियो ।

अमेरिकी विदेश मन्त्रालयका अनुशार मध्य सेप्टेम्बरसम्म ३१ हजारको भिसा यात्रा प्रतिबन्धको नियम अनुशार अस्वीकृत गरिएको छ । यो अवधिमा अमेरिकी सरकारले ७६ सयलाई भिसा सुविधा समेत प्रदान गरेको जनाएको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com