अमेरिकाले एकैबर्षमा दियो ८ लाख ३४ हजारलाई नागरिकता, ५ हजार बढी नेपाली
प्रकाशित मिति : माघ ३, २०७६ शुक्रबार
किशोर पन्थी
अमेरिकी सरकारले आर्थिक बर्ष सन् २०१९ मा ११ बर्षयताकै सबैभन्दा धेरै आप्रवासीहरुलाई अमेरिकी नागरिकता प्रदान गरेको छ । युएसीआईएसले अमेरिकी अध्यागमनबारे आज तथ्यांक सार्वजनिक गरेको हो ।
तथ्यांक अनुशार आर्थिक बर्ष सन् २०१९ मा ८ लाख ३४ हजार आप्रवासीहरुले अमेरिकी नागरिकता पाएका छन् । जसमा नेपालीहरुको संख्या ५ हजारभन्दा धेरै रहेको छ ।
त्यस्तै आर्थिक बर्ष सन् २०१९ मा युएससीआईएसले ५ लाख ७७ हजारको ग्रिनकार्ड आवेदन स्वीकृत गरेको छ ।
पेन्डिंग अवस्थामा रहेका ग्रिनकार्डका आवेदन १४ प्रतिशतले र नागरिकताका आवेदन १२ प्रतिशतले कमी आएको पनि युएससीआईएसले जनाएको छ ।
आर्थिक बर्ष २०१९ मा युएससीआईएसले झण्डै २२ लाख वर्क परमिटका आवेदनहरु प्राप्त गरेको छ । त्योबाहेक युएएसीआईएसले झण्डै ५ लाख गैरआप्रवासी कामदारका आवेदनहरु स्वीकृत गरेको छ । जसमा विशेष पेशा, अस्थायी कृषि र गैरकृषि कामदार लगायत अन्य कामदारहरु रहेका छन् ।
इ भेरिफाइमार्फत ४० मिलियन आवेदनहरु प्रकृयामा लगेको युएससीआईएसले जनाएको छ । मानवस्तकरीको शिकार भएका, महिलाविरुद्धको हिंशा लगायतका सन्दर्भमा झण्डै २५ हजारका लागि राहत स्वीकृत गरिएको छ ।
अहिलेसम्म अमेरिकी नागरिकता लिने नेपाली ५० हजार
अहिलेसम्म अमेरिकी नागरिकता लिने नेपालीहरुको संख्या झण्डै ५० हजार पुगेको अमेरिकी सरकारको डिपार्टमेन्ट अफ होमल्याण्ड सेक्युरिटीले जनाएको छ ।
अमेरिकी सरकारको आप्रवास तथ्यांक कार्यालयका अनुसार सन् १९९० सम्ममा अमेरिकी नागरिकता पाउन सफल नेपालीहरुको संख्या जम्मा २६१६ मात्र रहेको थियो । त्यतीबेला सन् १९९० कै वर्षमा जम्मा ३७ जना नेपालीले अमेरिकन नागरिकता लिएका थिए ।
त्यो भन्दा अगाडि सन् १९८९ मा ३५ जना नेपालीले अमेरिकन नागरिकता लिएका थिए । त्यसैगरी सन् १९८८ मा जम्मा ३१ जनाले र सन् १९८७ मा २२ जनाले अमेरिकन नागरिकता लिएका थिए ।
सन् १९९१ मा अमेरिकन पाउने नेपालीको संख्या थोरै बढेर ५६ पुगेको थियो । सन् १९९२ मा ४४ जना नेपालीहरुले अमेरिकन नागरिकता पाए । सन् १९९३ मा ४६ जनाले , सन् १९९४ मा ७० जनाले, सन् १९९५ मा ६० जनाले , सन् १९९६ मा ११९ जनाले, सन् १९९७ मा ७८ जनाले र सन् १९९८ मा ८२ जना नेपालीले अमेरिकन नागरिकता पाए ।
सन् १९९९ मा १४३ जनाले, सन् २००१ मा २०५ जनाले, सन् २००२ मा २४७ जनाले,सन् २००३ मा ३१८ जनाले , सन् २००४ मा ४०८ जनाले अमेरिकन नागरिकता पाए । त्यस्तै सन् २००५ मा ४१७ जनाले, २००६ मा ५७५ जनाले, सन् २००७ मा ६३८ जनाले, सन् २००८ मा ९५३ जनाले, सन् २००९ मा १६३२ जनाले, सन् २०१० मा २१८५ जनाले र सन् २०११ मा २२३५ जनाले अमेरिकन नागरिकता लिएका थिए ।
त्यस्तै सन् २०१२ मा २४४८ जना नेपालीहरुले अमेरिकन नागरिकता लिएका थिए । सन् २०१३ मा अमेरिकन नागरिकता लिने नेपालीहरुको संख्या २७११ रहेको थियो । सन् २०१४ मा २८८८ नेपालीले अमेरिकी नागरिकता लिए भने सन् २०१५ मा ४२२५ जना नेपालीले अमेरिकन नागरिकता लिए । सन् २०१६ मा ५ हजार ४ जना नेपालीहरुले अमेरिकाको नागरिकता लिए ।
सन् २०१७ मा भने अमेरिकी नागरिकता लिने नेपालीहरुको संख्या ४५ सय ९ रहेको थियो । सन् २०१८ मा अमेरिकाभर ५२५२ जना नेपालीहरुले अमेरिकाको नागरिकता लिएका छन् । सन् २०१९ र त्यसपछि अमेरिकी नागरिकता लिने नेपालीहरुको संख्या झण्डै ७ हजारको हाराहारीमा रहेको छ ।