अबुधाबी बस दुर्घटनामा मृत्यु हुने तीन र घाइते १४ नेपालीको पहिचान
प्रकाशित मिति : २ माघ २०७६, बिहिबार
युएईको अबुधावीमा भएको बस दुर्घटनामा ६ जनामध्ये ३ जना नेपाली भएको पुष्टी भएको छ । दुर्घटनामा भावना कुँवर, कृष्ण कुमारी अधिकारी र अमिसा मोक्तानको मृत्यु भएको छ । अधिकारी र कुँवर झापा र प्युठानका हुन् ।
गाडी चालक भने पाकिस्तानी रहेको जनाइएको छ । गाडी चालकको पनि मृत्यु भएको छ । त्यस्तै एकजना श्रीलंकन र एकजना अफ्रिकन महिलाको पनि मृत्यु भएको छ ।
घटनामा १९ जना घाइते भएका छन् । घाइतेमध्ये १४ नेपाली रहेको जनाइएको छ ।
दुर्घटनामा घाईते सिन्धुपाल्चोककी माया तामाङ, सरिता थापा, झापाकी तुलसा थापा, पवित्रा गुरुङ, इलामकी सिता सुब्बा, मकवानपुर टिस्टुङ पालुङकी रिता सिवाकोटी, चापागाउँ ललितपुरकी कमला नेपाली, झापाकी मुना राई, दाङ घोराहीकी आशा घर्ती मगर, सुजला विश्वकर्मा, नुवाकोटकी सरिता तामाङ, सुनसरी धरानकी वर्षा विश्वकर्मा, हेटौडाकी मिना सिंहको उपचार भइरहेको छ । चितवनकी निर्मला प्रजा उपचारपछि क्याम्पमा फर्केकी छन् ।
ट्रकमा ठोकिएपछि बस दुर्घटनाग्रस्त भएको थियो । चालकको असावधानीका कारण बस दुर्घटना भएको प्रहरीले जनाएको छ । दुबई जाने अलराहा बिच रोडमा दुर्घटना भएको जनाइएको छ ।
अबुधाबीका कैयन सिसिटिभी फुटेजमा उक्त बस असावधानीपूर्वक ट्रकको अगाडि गुडिरहेको र ट्रकले बचाउन खोज्दासमेत दुर्घटनाभएको देखिएको छ ।
#أخبارنا | بسبب سلوك سائق طائش وفاة 6 أشخاص واصابة 19 آخرين في حادث مروري بأبوظبي#شرطة_أبوظبي #أخبار_شرطة_أبوظبي https://t.co/iw7YcMC68m pic.twitter.com/SHYLwdFcSK
— شرطة أبوظبي (@ADPoliceHQ) January 16, 2020
स्थानीय समय अनुशार विहान साढे ६ बजे उक्त दुर्घटना भएको हो । विहान ९ बजेतिर उक्त बाटो पुन खोलिएको थियो ।
उक्त बस अत्यन्तै तीब्र गतिमा रहेको समेत जनाइएको छ । घटना लगत्तै एम्बुलेन्स पुगेको थियो भने घाइतेहरुलाई उपचारका लागि अस्पताल लगिएको थियो ।