आज न्युयोर्कको ट्रेनमा पाइन्ट उतारेर हिड्नेहरु भेटिने
प्रकाशित मिति : पुस २७, २०७६ आईतबार
आज न्युयोर्क सिटीको सब वे तिर पाइन्ट नलगाएका व्यक्ति देख्नुभएको खण्डमा अचम्म नपर्नुहोला । आजलाई न्युयोर्कमा कतिपयले पाइन्ट उतारेर ट्रेनमा हिड्ने दिनका रुपमा मनाउँछन् ।
दिउसो तीनबजेदेखि ४ बजेसम्म म्यानहटनको फोली स्क्यावरमा जम्मा हुने कार्यक्रम तय भएको छ । फोली स्क्वायरमा भेट भइसकेपछि सबैका लागि कुन ट्रेन चढ्ने भन्ने विभाजन गरिनेछ ।
सब वे भित्र चढिसकेपछि एकअर्कासँग कुराकानी नगरी अपरिचित सरह नै उनीहरु ट्रेनभित्र चढनेछन् । जब ट्रेनको ढोका बन्द हुनेछ, सबैले आआफ्ना पाइन्टहरु उतारेर झोलाभित्र राख्नेछन् । कसैले किन पाइन्ट उतारेको भनेर सोधेमा असहज भएकाले भन्ने जवाफ दिनेछन् ।
त्यसपछि तोकिएको स्टेशनमा झरेपछि पुन अर्को ट्रेनमा चढ्ने कार्यक्रम तय भएको छ । त्यहाँ उनीहरुलाई कसैले किन पाइन्ट नलगाएको भनेर सोधेमा पाइन्ट घरमै बिर्सेको भनेर जवाफ दिनेछन् ।
सबै ट्रेनका बाटोहरु युनियन स्क्वायर हुँदै अगाडि बढ्नेछन् । कार्यक्रममा सहभागी हुनेहरुलाई सकभर दुईवटा अण्डरवेयर पहिरन र अण्डरवेयर धेरै सानो नभई अलिक तलसम्मको पहिरिन सुझाव दिइएको छ ।
धेरै सानो अण्डरवेयर पहिरिदा मान्छेहरु रिसाउन सक्ने भएकाले अरु सर्वसाधारणहरुलाई हसाउने र रमाइलो हुने खालका अण्डरवेयर पहिरिन सुझाव दिइएको छ ।
न्युयोर्कमा यो बर्षको मुख्य कार्यक्रम इम्पु्रभ एभ्रिह्वेयर नामको कम्पनीले गर्ने भएको छ । सन् २००२ देखि सुरुवात गरिएको पाइन्ट नलगाउने दिन अहिले विश्वका ६० भन्दा धेरै सहरमा मनाइन्छ ।
यसको उद्देश्य केवल रमाइलो गर्नुमात्र रहेको छ । न्युयोर्कमा आज दिउसोको तापक्रम ६० डिग्री फरेनहाइट भन्दा माथि हुनेभएकाले आज त्यती चिसो समेत नहुने भएको छ ।