‘म राम्रो भएर अस्पतालबाट घर जाँदै छु : प्रधानमन्त्रीओली
प्रकाशित मिति : मंसिर १९, २०७६ बिहीबार
१० दिनको अस्पताल बसाइपछि प्रधानमन्त्री केपी शर्मा ओली बिहीबार डिस्चार्ज हुनुभएको छ । एपेन्डिसाइटिसको शल्यक्रिया र पेटमा फैलिएको संक्रमणको उपचारका लागि महाराजगञ्जस्थित मनमोहन कार्डियो भास्कुलर थोरासिक एण्ड ट्रान्सप्लान्ट सेन्टरमा यही मंसिर १० गते भर्ना भएका ओली स्वास्थ्यमा उल्लेखनीय सुधार आएपछि आज बिहीबार बालुवाटार फर्किनु भएको हो ।
डिस्चार्ज भएर जाँदै गर्दा प्रधानमन्त्रीओलीले हाँस्दै भन्नुभयो ‘म स्वास्थ्यमा सुधार भएर राम्रो भएर अस्पतालबाट डिस्चार्ज भएर घर जाँदै छु।’
चिकित्सकले उहाँलाई थप संक्रमणबाट जोगाउन केही दिन अझै अस्पताल राख्ने सोच बनाएपनि ओलीले बालुवाटारमै गएर आराम गर्ने चाहना व्यक्त गरेपछि उहाँलाई आजनै डिस्चार्ज गरिएको अस्पतालले जनाएको छ ।
प्रधानमन्त्रीलाई भर्ना भएकै दिन एपेन्डिसाइटिसको शल्यक्रिया गरिएको थियो भने भोलिपल्टसम्म भेन्टिलेटरमा राखिएको थियो । उहाँलाई संक्रमणबाट जोगाउन अस्पतालबसाई अवधिभर आईसीयुमै राखेर उपचार गरिएको थियो ।