पोर्चुगल र लण्डनमा भारतीय दूतावास अगाडि नेपालीको प्रर्दशन , ज्ञापनपत्र हुलाकबाट
प्रकाशित मिति : मंसिर १७, २०७६ मंगलबार
लण्डनमा नेपालीहरुको प्रदर्शन ।
– हरिकृष्ण पन्थी
भारतले सार्वजनिक गरेको नयाँ नक्सा र भारतीय सिमा अतिक्रमणबिरुद्ध पोर्चुगलमा रहेका नेपालीहरुले लिस्वनमा रहेको भारतीय दूतावास अगाडि विरोध प्रदर्शन गरेको छन् । गो ब्याक ईन्डिया लेखेका प्ले कार्ड सहित प्रदर्शनमा उत्रिएका नेपालीले सिमा अतिक्रमणको विरोध गरेका थिए ।
विश्वका विभिन्न देशमा रहेका नेपालीहरुले ती देशमा रहेका भारतीय दूतावास अगाडि प्रदर्शन गर्ने क्रममा लिस्बनमा पनि प्रदर्शन गरेका हुन् । एनआरएनएए पोर्चुगलको अगुवाईमा भएको प्रदर्शनमा विभिन्न संघ संस्थाका तर्फबाट समेत सहभागिता जनाइएको थियो ।
भारतीय दूतावासमा ज्ञापनपत्र बुझाउन गएका नेपालीहरुलाई भने दूतावासभित्र छिर्न नदिइएको जनाइएको छ । दूतावासले ज्ञापन पत्र बुझ्न नमानेपछि हुलाकमार्फत ज्ञापनपत्र पठाइने भएको छ ।
यसैबीच एनआरएएन युकेको नेतृत्वमा बेलायतस्थित भारतीय दुताबास अगाडि नेपालको भूभाग समेटर बनाइएकोले उक्त नक्सा सच्याउनुपर्ने, कालापानीबाट भारतीय सेना तत्काल हटाउनुपर्ने लगायतका माग राखेर बिरोध प्रदर्शन गरिएको छ । मार्च पास र नारावाजी गर्न रोक लगाइएकाले मौन बसेर विरोध प्रदर्शन गरिएको थियो ।
अध्यक्ष पुनम गुरुङले विरोध कार्यक्रममा सहभागी सबैलाई धन्यवाद दिदैँ विरोध पत्र पढेर सुनाएकी थिइन् । उनले अब इमेल र पोस्ट मार्फत पत्र हाइ कमिसन पठाइने पनि जनाइन् ।
विरोधपत्रमा ऐतिहासिक दस्तावेजले उल्लेखित भूभाग नेपालकै भएको प्रष्ट्याउंदा पनि भारतले एकतर्फी नक्सा जारी गर्दा विदेशभर रहेका नेपाली दुःखी भएको उल्लेख छ । भारत नेपाल सीमा विवाद शताब्दीयौं लामो रहेको र यसको समाधानका लागि दुई देशस्थित विदेश मन्त्रालयका उच्च अधिकारीहरुबीच वार्ता भइरहेको अवस्थामा त्यसको निचोड नआउंदै नक्सा जारी गरिनु विडम्बना भएको पत्रमा जनाइएको छ । भारतको उक्त कार्य अन्तर्राष्ट्रिय मुल्य मान्यता विपरित भएको पत्रमा उल्लेख छ ।
लण्डनमा पनि विरोधपत्र हुलाकमार्फत नै पठाइने भएको छ ।