अमेरिकामा एसाइलम अस्वीकृत हुनेलाई ग्वाटेमालाको दुर्गम जंगल पठाउने प्रस्ताव
प्रकाशित मिति : मंसिर १, २०७६ आईतबार
मध्य अमेरिकी राष्ट्रहरु र ट्रम्प प्रशासनबीचको सहमतिको एउटा भाग अनुशार अमेरिकी सिमाक्षेत्रमा एसाइलम अस्वीकृत हुनेहरुलाई ग्वाटेमालाको जंगलमा रहेको एउटा विमानस्थलमा लगेर छाड्न सकिने प्रस्ताव ग्वाटेमालाले गरेको छ । ग्वाटेमालाका गृहमन्त्री एनरिक डेगनहर्ट अमेरिकासँग सहमतिलाई अन्तिम टुंगो लगाउन शुक्रबार वासिंटन डिसीमा आएका थिए ।
ग्वाटेमालाको राजधानीदेखि निकै टाढा रहेको पेटे डिपार्टमेन्टमा अमेरिकाबाट आप्रवासीहरुलाई लिने र सेटल गर्ने योजना ग्वाटेमालाले बनाएको छ । योजना अनुशार अमेरिकी अधिकारीहरुले कागजपत्रविहिनहरुलाई पेटेन मुन्डो माया पठाउनुपर्नेछ ।
पेटेन मुन्डो माया विमानस्थल मायन खण्डहरु हेर्न जाने पर्यटकहरुले आफ्नो गन्तब्य बनाउने गरेका छन् । त्यहाँबाट अमेरिकाका लागि कुनै सिधा उडान छैन । जसका कारण अमेरिकी एभियसनले नयाँ बाटो स्वीकृत गराएरमात्र त्यहाँ आप्रवासीलाई पठाउन सकिनेछ ।
अमेरिकाले पेटेन मुण्डोमा पुनर्वासका लागि सुविधाको कमी रहेको भन्दै ग्वाटेमालाको प्रस्ताव स्वीकारेको छैन । अमेरिकी सरकारले पेटेनको जंगलमा नभई ग्वाटेमालाको अरु अन्तर्राष्ट्रिय विमानस्थलमा आप्रवासी पठाउने व्यवस्थाका लागि ग्वाटेमालालाई सुझाव दिएको छ ।
ग्वाटेमालाका गृहमन्त्रीले भने पेटेन अमेरिकाबाट पठाइने कागजपत्रविहिनका लागि आकर्षक विकल्प भएको बताएका छन् । उनका अनुशार अमेरिकासँग सिधा उडान नभएपनि पेटेन माया विमानस्थल ग्वाटेमालाको अन्तर्राष्ट्रिय विमानस्थल मध्येको एक हो । उनले केही एसाइलम आवेदकलाई ग्वाटेमाला सिटी र केहीलाई पेटेन पठाउन सकिने समेत बताएका छन् ।