अनेसासको सबैभन्दा ठूलो राशीको पुरस्कारबाट प्रा. डा. लुइटेल वासिंटन डिसीमा सम्मानित
प्रकाशित मिति : कार्तिक २५, २०७६ सोमबार
वरिष्ठ समालोचक प्रा. डा. खगेन्द्रप्रसाद लुइटेलले अन्तर्राष्ट्रिय नेपाली साहित्य समाजको अहिलेसम्मकै ठूलो धनराशीको रामलामा अविनाशी विशिष्ट प्रतिभा पुरस्कार प्राप्त गर्नुभएको छ । अमेरिकाको वासिंटन डिसीमा आयोजित एक समारोहमा उहाँलाई २५ सय डलर (झण्डै ३ लाख रुपैया) को उक्त पुरस्कार प्रदान गरिएको हो ।
महाकवि लक्ष्मीप्रसाद देवकोटाको १११औं जन्मजयन्तीका अवसरमा अमेरिकाको वासिङ्टन डिसीमा आयोजित कार्यक्रममा लुइटेललाई नगदसहित सम्मानपत्र प्रदान गरिएको हो । समाजले हरेक दुई वर्षमा नेपाली भाषाका साहित्य स्रष्टाहरुलाई उक्त पुरस्कार प्रदा गर्दै आएको छ। पुरस्कार अमेरिकाका लागि नेपाली राजदूत डा. अर्जुनकुमार कार्की तथा बोर्ड अफ ट्रस्टी अध्यक्ष गीता खत्रीले संयुक्त रुपमा प्रदान गर्नुभयो ।
प्रा. डा. लुइटेलल कहिले पनि आफूले पुरस्कार पाउने आशामा कुनै काम नगरेको तर काम गर्दै जाँदा प्राप्त सम्मानलाई स्वीकार्ने बताउनुभएको छ । उहाँले क श्रेणीको महेन्द्र विद्याभूषण, सम शतवार्षिकी सम्मान, अक्सफोर्ड इन्टरनेसनल पब्लिकेसनबाट विशेष सम्मान–अभिनन्दन, नोबल साकोस दुर्गा–विष्णु समालोचना र साहित्य सम्मान तथा पुरस्कार लगायत एकसयभन्दा धेरै सम्मान र पुरस्कारहरु प्राप्त गरिसक्नुभएको छ । त्रिभुवन विश्वविद्यालय नेपाली केन्द्रीय विभाग कीर्तिपुरमा सम्बद्ध उहाँ २०३३ सालदेखि शिक्षण र प्राध्यापन पेशामा हुनुहुन्छ । उहाँले एकसयभन्दा धेरै पुस्तक लेखन, प्रकाशन र सम्पादन गर्नुभएको छ ।
यस वर्ष नेपाली साहित्यका विभिन्न विधामा गरी आठ पुस्तकहरु पुरस्कृत गरिएको छ । दुई हजार डलर राशिको अनेसास सर्वोत्कृष्ट पुस्तक पुरस्कारबाट कथाकार नरेन्द्रराज पौडेलको रोबोटका आँखा कथासंग्रह, एघार सय डलर राशिको अनेसास दिललीला सर्वोत्कृष्ट डायस्पोरा पुस्तक पुरस्कारबाट उपन्यासकार रमेश दियालीको छाप्रो नं. ५५ उपन्यास र एघार सय डलर राशिको अनेसास रोहिणी शर्मा सीता शर्मा सर्वोत्कृष्ट काव्य पुरस्कारबाट कुन्ता शर्माको मेरो मान्छे कवितासंग्रहलाई पुरस्कृत गरिएको छ।
हजार डलर राशिको अनेसास पदम विश्वकर्मा सर्वोत्कृष्ट कथा पुरस्कार कथाकार युवराज मैनालीलाई र हजार डलर राशिको अनेसास स्व. डिल्लीराम तिम्सिना सर्वोत्कृष्ट उपन्यास पुरस्कार उपन्यासकार तीर्थ गुरुङलाई प्रदान गरिएको छ।
पाँच सय डलर राशिको अनेसास श्याम कार्की इन्दिरा कार्की सर्वोत्कृष्ट निबन्ध पुरस्कार यस वर्ष नियात्राकार घनश्याम राजकर्णिकारलाई प्रदान गरिएको छ।
पाँच सय डलर राशिको अनेसास गीता खत्री सर्वोत्कृष्ट गजल पुरस्कार नमिता बरालले पाएकी छन्। पाँच सय डलर राशिकै मस्टो संस्कृति सांस्कृतिक अनुसन्धानपरक कृतिका लागि संस्कृतिविद् तेजबहादुर कार्कीलाई प्रदान गरिएको छ।