भारतले हडपेको जमीन फिर्ता गर्न माग
प्रकाशित मिति : कार्तिक २४, २०७६ आईतबार
हडपेको जमीन भारतले फिर्ता गर्नुपर्ने भन्दै ‘सिमाना बचाउ अभियान’ नामक संस्थाले आज माइतीघर मण्डलमा विरोध प्रदर्शन गरेको छ ।
राजनीतिक वार्तामार्फत सरकारले कूटनीतिक पहल चाल्नुपर्ने अभियानका धनराज वास्तविकले बताउनुभयो । “नेपाली जनताले सडकमार्फत गरेको आन्दोलनलाई भारतले सुन्नैपर्छ”, उहाँले भन्नुभयो, “जबसम्म भारतले हाम्रो कुरा सुन्दैन, हामी हाम्रो आन्दोलन कायम राख्छौँ ।”
सुघौली सन्धिपछि भएको अतिक्रमणको जवाफ भारत सरकारले दिनैपर्ने र समयमै नेपालको भू–भाग फिर्ता गर्नुपर्ने उहाँले बताउनुभयो । भारतको नयाँ नक्सामा नेपालको सीमालाई समेत आफ्नै भनेर राख्नु आफैँमा लाजमर्दाे रहेको भन्दै अभियानका सुशीला लामिछानेले सरकार यतिबेला मौन भएर बस्न नहुने बताउनुभयो । उहाँले भन्नुभयो, “जनकपुरमा भारतले आफ्नै सेना खटाउनु र नेपाली चेलीलाई समेत बलात्कार गर्नु निन्दनीय छ ।”
समाजसेवी, विद्यार्थी, सर्वसाधारणलगायतले समेत आन्दोलनमा सहभागिता जनाएका छन् । ‘कालापानी, लिम्पियाधुरा र लिपुलेक फिर्ता गर’ भन्ने उनीहरुको माग छ ।
–––