महरा थप ३ दिन हिरासतमै
जिल्ला अदालत काठमाडौंले निवर्तमान सभामुख कृष्ण बहादुर महरालाई थप तीन दिन हिरासतमा राख्न अनुमति दिएको छ । महिला कर्मचारीमाथि जबरजस्ती करणीको प्रयास गरेको अभियोग लागेका महरालाई न्यायाधीश दीपककुमार दाहालको इजलासले अनुसन्धानका लागि थप तीन दिन म्याद दिएको हो ।
जिल्ला न्यायाधीवक्ताको कार्यालयले मंगलबार अदालतमा पेश गरेपछि शुक्रबारसम्मका लागि म्याद थप गरिएको हो । अदालतले अब महरालाई आइतबार अदालतमा उपस्थित गराउन आदेश दिएको छ, भने थप गरिएको म्याद शुक्रबार सकिदैछ । शनिबार सार्वजनिक बिदा भएकाले महरालाई आइतबार अदालतमा पेश गरिने भएको छ ।
प्रहरीले निवर्तमान सभामुख महरालाई असोज १९ गते बालुवाटारस्थित सरकारी निवासबाटै नियन्त्रणमा लिएको थियो ।
