डिपोर्टेशन बढाउन अमेरिकामा पक्राउ परेकाहरुको सुनुवाई मंगलबारदेखि फटाफट
अमेरिकाबाट देशनिकालाको क्रम तीब्र पार्न अब पक्राउ परेकाहरुको सुनुवाई फटाफट हुने भएको छ । अमेरिकामा अपराध गरेका कारण वा गैरकानुनी रुपमा अमेरिका छिर्न खोज्दा सिमाक्षेत्रमा समातिएकाहरुको अदालती सुनुवाई फटाफट गर्नेगरी पहिलो प्राथमिकतामा राखिएको छ । चिफ इमिग्रेशन जज म्यारीबेथ केलरले मंगलबार सबै अध्यागमन न्यायाधिसहरु, अदालतका प्रशासकहरु र अध्यागमन अदालतका कर्मचारीहरुका नाममा मेमो जारी गर्दै अदालतमा सुनुवाईको प्राथमिकता क्रम बदल्न निर्देशन दिएका हुन् ।
पहिले गैरकानुनीरुपमा अमेरिका प्रवेश गर्न खोज्दा सिमाक्षेत्रमा रोकिएका बालबालिका र परिवारका मुद्दालाई पहिलो प्राथमिकतामा राखेर फटाफट सुनुवाई गरिदै आएपनि अब इमिग्रेशन एण्ड कस्टम इन्फोर्समेन्ट र कस्टम एण्ड बोर्डर प्रोटेक्सन लगायतका संघीय एजेन्सीहरुले नियन्त्रणमा लिएकाहरुको सुनुवाई पहिलो प्राथमकितामा राखिएको छ । अब पक्राउ परेकाहरुको सन्दर्भमा न्यायाधिसहरुले यथाशीघ्र सुनुवाई राख्नेछन् । सुनुवाईपछि बलियो केस नभएकाहरुलाई डिपोर्ट गरिनेछ । जसले गर्दा अध्यागमन जेलहरुमा अब पहिलेजस्तो चाप नहुने अनुमान गरिएको छ ।
ओबामा प्रशासनका पालामा गैरकानुनीरुपमा अमेरिका प्रवेश गर्न खोज्दा सिमाक्षेत्रमा रोकिएका कसैको साथ नभएका बालबालिकाहरुको मुद्दालाई पहिलो प्राथमिकता, डिटेन्सनको विकल्पका रुपमा रिहा भएका बालबालिकासहितका परिवारलाई दोश्रो प्राथमिकता, पहिले नियन्त्रणमा लिएर पछि रिहा गरिएका परिवारलाई तेश्रो र हालचालैको अवस्थामा गैरकानुनी रुपमा सिमापार गरेर समातिएपछि छाडिएकाहरुलाई चौथो प्राथमिकतामा राखिएको थियो । अब भने सबै नियन्त्रणमा लिइएकाहरुलाई पहिलो प्राथमिकतामा, कसैको साथ नभएका बालबालिकाहरुलाई दोश्रो र बाँकीलाई तेश्रो प्राथमिकतामा राखिएको छ ।
