अमेरिकी कामदारभिसाको निर्णय अब १५ दिनमै
अमेरिकी सरकारको युएससीआईएसले सोमबारदेखि लागु हुनेगरी कामदार भिसा एचवानबीको निर्णय १५ दिनमा नै प्राप्त गर्न सक्ने गरी शीघ्र प्रकृया सुचारु गरेको छ । सन् २०१८ को अप्रिलमा आवेदन दिएकाहरुले अब एचवानबी भिसाका लागि अतिरिक्त शुल्क तिरेर आफ्नो आवेदनबारे छिटो निर्णय गराउन सक्नेछन् ।
एचवानबी भिसाका सन्दर्भमा युएससीआईएसले शीघ्र प्रकृया अर्थात् प्रिमियम प्रोसेसिङ स्थगित गरेको थियो । तर जनबरी २८ देखि लागु हुनेगरी यो प्रकृया पुन सुचारु गरिएपछि अब आवेदकहरुले यसबाट लाभ लिन सक्नेभएका छन् । तर त्यसका लागि १४१० डलर अतिरिक्त शुल्क तिर्नुपर्नेछ ।
युएससीआईएसले एचवानबी भिसाका सन्दर्भमा गत अप्रिलमा प्रिमियम प्रोसेसिङ स्थगित गरेको थियो । गत सेप्टेम्बरमा स्थगन अवधि थपिएपछि आगामी फरबरी १९ सम्म स्थगन कायम रहने अपेक्षा गरिएको थियो । तर जनबरी २८ देखिनै प्रिमियम प्रोसेसिङ सुचारु गरिएको छ ।
आर्थिक बर्ष २०१९ का लागि एचवान बी भिसा आवेदन दिएका अमेरिकन डिग्री होल्डर २० हजार र अन्य ६५ हजार गरी ८५ हजार आवेदकमध्ये पेन्डिङ रहेकाहरुले प्रिमियम प्रोसेसिङ गर्न सक्नेछन् । थप कागजातको अनुरोध पठाइएकाहरुले पनि प्रिमियम प्रोसेसको अनुरोध सहित थप कागजात पेश गरेमा १५ दिनभित्र निर्णय दिइने युएससीआईएसले जनाएको छ ।
१५ दिनभित्र निर्णय दिन नसकेको खण्डमा युएससीआईएसले लिएको शुल्क फिर्ता गर्ने जनाएको छ । साथै आवेदनबारे यथाशीघ्र निर्णय दिने पनि स्पष्ट पारेको छ । यो सेवा नयाँ आवेदनका सन्दर्भमा नभई पेन्डिङ आवेदनको सन्दर्भमा मात्र लागु हुने युएससीआईएसले स्पष्ट पारेको छ । आर्थिक बर्ष २०१९ को कोटा पुग्ने गरी युएससीआईएसमा आवेदन प्राप्त भइसकेका छन् ।
तर एचवान बी भिसा थप, सुधार वा स्थानान्तर गर्न चाहनेहरुका लागि भने प्रिमियम प्रोसेसिङ उपलब्ध नभएको अमेरिकाका चर्चित नेपाली कानुन व्यवसायी केशवराज सेडाईले जानकारी दिनुभयो । आर्थिक बर्ष २०२० का लागि भने आगामी अप्रिलको पहिलोसाता कामदार भिसा एचवानबीका लागि आवेदन दिनुपर्नेछ ।
