अमेरिकाको स्टोरमा दिउसै गोली प्रहार, गोरखाकी रचना श्रेष्ठ गम्भिर घाइते
प्रकाशित मिति : श्रावण ९, २०७५ बुधबार
ओक्लोहोमा राज्यको अटोकामा रहेको स्टोरमा काम गर्ने नेपाली महिलालाई लुटेराले दिउसै गोली हानेका छन् । गोरखाकी रचना श्रेष्ठमाथि लुटेराले ८ राउण्ड गोली हानेको जनाइएको छ । युएस ७५ को कर्नरमा रहेको बडिज ह्याण्डीमार्टमा कार्यरत उनलाई गोली लागेर ढलेको अवस्थामा फेला पारिएको थियो ।
दिउसो सबा १२ बजेतिर टाउकोबाट रक्तश्राव भइरहेको अवस्थामा भेटिएकी उनलाई अटोका अस्पतालमा लगिएको थियो । त्यहाँ उपचार हुन नसकेपछि उनलाई एयर एम्बुलेन्समार्फत तुल्सा अस्पतालमा लगिएको छ ।
लुटेराले पसल लुट्ने क्रममा उनीमाथि कैयन पटक गोली हानेकाले घाइतेको अवस्था चिन्ताजनक रहेको छ । घटनापछि ग्यास स्टेशन सहितको उक्त स्टोर बन्द गरिएको छ ।
गोली हान्ने व्यक्तिलाई नजिकैको म्याकडोनाल्डबाट गिरफ्तार गरिएको छ । १८ बर्षको जिमुन्तेज हिललाई ज्यानमार्ने उद्योग गरेको अभियोगमा मुद्दा चलाइएको छ ।
फोर्थ जुलाईको पूर्व सन्ध्यामा भर्जिनियामा ग्यास स्टेशनमा काम गर्ने नेपाली रेशम बजगाई मारिएको घटना सेलाउन नपाउँदै यो घटना भएको हो । राती सबा १ बजे ४० बर्षीय बजगाईको हत्या भएको थियो ।
