नेपालबाट ४० लाख भन्दा धेरै डिभीका आवेदन, ६० लाख भन्दा धेरै सहभागी
प्रकाशित मिति : आश्विन १६, २०७३ आईतबार
नेपालबाट अहिलेसम्म डिभी लोटरीका लागि ४० लाख भन्दा धेरैले आवेदन दिइसकेको अमेरिकी सरकारको डिपार्टमेन्ट अफ स्टेटको तथ्यांकले देखाएको छ । तथ्यांक अनुशार आवेदकका छोराछोरी र दम्पत्तिहरुको संख्या जोड्दा यो संख्या ६० लाख भन्दा धेरै रहेको छ । यसरी हेर्दा हाइस्कुल स्तर (१२ कक्षा) सम्मको डिभीका लागि शैक्षिक योग्यता पूरा गरेका अधिकांश नेपालीहरुले डिभी लोटरीका लागि आवेदन दिएको स्पष्ट देखिन्छ ।
आर्थिक बर्ष २०१७ को डिभी लोटरी (जसको भिसा प्रकृया सन् २०१६ को अक्टोबर १ देखि सुरु भइसकेको छ )का लागि विश्वभरबाट १ करोड २४ लाख ३७ हजार १ सय ९० जनाले आवेदन दिएका थिए । उनीहरुका आफन्तहरुसमेत जोड्दा आवेदकहरु १ करोड ९३ लाख ४४ हजार ५ सय ८६ जना रहेका थिए । ति मध्ये झण्डै १० लाख नेपालीहरु रहेको तथ्यांक रहेको छ । उनीहरुले सन् २०१५ को अक्टोबर १ देखि नोभेम्बर ३ सम्म डिभी लोटरी भरेका थिए ।
आर्थिक बर्ष २०१६ को डिभी कार्यक्रमका लागि विश्वभरबाट १ करोड १३ लाख ९१ हजार १ सय ३४ जनाले डिभी लोटरी भरेका थिए । उनीहरुका आफन्तहरुसमेत जोड्दा यो संख्या १ करोड ७५ लाख ७३ हजार ३ सय ५० रहेको थियो । उनीहरुमध्ये नेपालीहरु झण्डै १० लाखकै हाराहारीमा रहेका थिए । उनीहरुले सन् २०१४ को अक्टोबर १ देखि नोभेम्बर ३ सम्म डिभी लोटरी भरेका थिए ।
त्यस्तै आर्थिक बर्ष सन् २०१५ को डिभी लोटरी कार्यक्रमका लागि ५ लाख ४५ हजार ८ सय २५ जना नेपालीहरुले डिभी लोटरीको फर्म भरेका थिए । उनीहरुका नजिकका आफन्तहरु ३ लाख ४७ हजार १ सय ३६ जना समेत जोड्दा सन् २०१५ को डिभी कार्यक्रममा सहभागी हुने नेपालीहरु ८ लाख ९२ हजार ९ सय ६१ जना रहेका थिए ।
त्यसैगरी सन् २०१४ को डिभी कार्यक्रमका लागि आवेदक र उनीहरुका आफन्तहरुसहित ६ लाख १३ हजार ३ सय ८५ जना नेपालीहरु कार्यक्रममा सहभागी भएका थिए भने सन् २०३ को डिभी कार्यक्रममा आवेदक र उनीहरुका आफन्तहरुसहित ४ लाख ९६ हजार ४ सय १० जना नेपालीहरु डिभी कार्यक्रममा सहभागी भएका थिए ।
कुन बर्ष कति नेपालीले भरे डिभी लोटरी ? यससम्बन्धि अमेरिकी सरकारको तथ्यांक ।
