युटामा आप्रवासी गिरफ्तारी दर तीव्र: क्यालिफोर्निया र न्यूयोर्कभन्दा अगाडि
प्रकाशित मिति : २७ भदौ २०८३, शनिबार
तस्वीर : आइस
हालै सार्वजनिक भएको एक अध्ययन अनुसार सन् २०२२ को शरद ऋतुदेखि २०२६ को वसन्तसम्म अमेरिकाको युटा राज्यमा प्रतिव्यक्ति आप्रवासी गिरफ्तारी दर देशमै नवौँ स्थानमा परेको छ। यस दरले न्यूयोर्क र क्यालिफोर्निया जस्ता ठूला राज्यहरूलाई पनि पछाडि पारेको छ।
युनिभर्सिटी अफ क्यालिफोर्निया, बर्क्लेको ‘डिपोटेसन डाटा प्रोजेक्ट’को तथ्याङ्कमा आधारित रही अध्यागमन वकिलहरूसँग मिलेर तयार पारिएको अध्ययन अनुसार, अक्टोबर २०२२ देखि मार्च २०२६ सम्ममा आइसले युटामा ७,८१७ जनालाई गिरफ्तार गरेको छ। यो अवधिमा औसतमा प्रतिदिन छ जना गिरफ्तार भएका थिए।
अध्ययनमा संलग्न ‘द मेन्डोजा ल फर्म’का वकिलहरूका अनुसार साल्ट लेक सिटी, प्रोभो र पश्चिमी क्षेत्रका कृषि उपत्यकाहरूमा रहेका आप्रवासी समुदायहरूले निर्माण, खानी, खाद्य प्रशोधन तथा हस्पिटालिटी क्षेत्रमा लामो समयदेखि योगदान पुर्याउँदै आएका छन्। युटाको द्रुत जनसङ्ख्या वृद्धिले ल्याटिन अमेरिका र अन्य क्षेत्रका श्रमिकहरूलाई आकर्षित गरेको छ भने अर्कातर्फ सङ्घीय अध्यागमन कारबाही पनि बढेको छ।
अघिल्लो राष्ट्रपति ट्रम्पको कार्यकालदेखि नै युटामा गिरफ्तारी दर निरन्तर बढिरहेको छ। उत्तरी युटामा हाल प्रतिदिन औसत १० भन्दा बढी र दक्षिणी युटामा गिरफ्तारी संख्या चार गुणाले बढेको छ। प्रशासनले आपराधिक पृष्ठभूमि भएका आप्रवासीहरूलाई लक्षित गरिएको दाबी गरे तापनि युटामा पक्राउ परेका अधिकांश आप्रवासीहरूको कुनै आपराधिक रेकर्ड छैन।
अध्ययन अनुसार प्रति एक लाख बासिन्दामा ६४.०३ गिरफ्तारी दरसहित युटा नवौँ स्थानमा छ। यो दर न्यु मेक्सिको (६५.१८) भन्दा थोरै कम र अर्कान्सस (६३.७८) भन्दा बढी हो। युटाले कुल आइस गिरफ्तारीको १.३ प्रतिशत ओगटेको छ, जबकि देशको कुल जनसङ्ख्यामा युटाको हिस्सा १ प्रतिशत मात्र छ।
यस सूचीमा १ लाख ५० हजारभन्दा बढी गिरफ्तारीसहित टेक्सास पहिलो स्थानमा छ भने भर्मोन्ट (प्रति एक लाखमा ५.७) अन्तिम स्थानमा छ।