ट्रम्प प्रशासनद्वारा अनधिकृत अप्रवासीलाई राज्यसरहको अध्ययन छुट दिएको भन्दै थप चार राज्यविरुद्ध मुद्दा दायर
प्रकाशित मिति : १३ भदौ २०८३, शनिबार
Photo: Avi Waxman/Unsplash
अमेरिकाको ट्रम्प प्रशासनले बिहीबार देशमा गैरकानुनी रूपमा बसोबास गरिरहेका अप्रवासीहरूलाई राज्यका नागरिकसरह कलेज शुल्क छुट, अनुदान तथा राज्य-वित्तपोषित विद्यार्थी ऋण सुविधा दिएको भन्दै थप चारवटा राज्यविरुद्ध मुद्दा दायर गरेको छ। जस्टिस डिपार्टमेन्टले ओरेगन, वासिङ्टन, न्यु मेक्सिको र एरिजोना राज्यका कानुनहरू सङ्घीय कानुनविपरीत रहेको दाबी गर्दै अदालतमा मुद्दा हालेको हो।
जस्टिस डिपार्टमेन्टका अनुसार, सङ्घीय कानुनले कुनै पनि अनधिकृत अप्रवासीलाई अमेरिकी नागरिकले नपाउने उच्च शिक्षासम्बन्धी सुविधा दिन निषेध गरेको छ।
जस्टिस डिपार्टमेन्टको सिभिल डिभिजनका सहायक महान्यायाधिवक्ता ब्रेट ए. सुमेटले जारी गरेको विज्ञप्तिमा भनिएको छ, “यो सङ्घीय कानुनको एक सीधा विषय हो: कलेजहरूले अमेरिकी नागरिकलाई नदिइने सुविधाहरू गैरकानुनी अप्रवासीहरूलाई उपलब्ध गराउन पाउँदैनन्। यो जस्टिस डिपार्टमेन्टले अमेरिकी विद्यार्थीहरूलाई आफ्नै देशमा दोस्रो दर्जाको नागरिक सरह व्यवहार गरिएको सहन गर्दैन।
यस नयाँ कानुनी कदमसँगै गैरकानुनी रूपमा बसोबास गर्ने विद्यार्थीहरूलाई स्थानीय बासिन्दासरह सुविधा दिएको अभियोगमा ट्रम्प प्रशासनबाट मुद्दा खेप्ने अमेरिकी राज्यहरूको सङ्ख्या २१ पुगेको छ। यसअघि जस्टिस डिपार्टमेन्टले टेक्सास, केन्टकी, ओक्लाहोमा, नेब्रास्का र इलिनोय राज्यविरुद्धका मुद्दा जितिसकेको छ।
सह-महान्यायाधिवक्ता स्ट्यान्ली ई. वुडवर्ड जुनियरले भने, राष्ट्रपति ट्रम्पको बाचा पूरा नभएसम्म हाम्रा प्रयासहरू रोकिने छैनन्: अमेरिकी नागरिकहरूलाई नदिइएका सुविधाहरू गैरकानुनी अप्रवासीहरूले पाउने छैनन्।
राज्यभित्रका र राज्यबाहिरका विद्यार्थीहरूको शिक्षण शुल्कमा ठूलो अन्तर छ। उदाहरणका लागि, सन् २०२६-२०२७ का लागि वासिङ्टन विश्वविद्यालयमा स्थानीय बासिन्दाले १३,४०६ डलर बुझाउनुपर्छ भने बाहिरका विद्यार्थीले ४४,४६० डलर तिर्नुपर्छ। यसको अर्थ स्थानीय हाई स्कुल पूरा गरेका र तोकिएका सर्तहरू पूरा गरेका अनधिकृत अप्रवासीले वार्षिक ३१,०५४ डलरसम्मको छुट पाउँछन्।
जस्टिस डिपार्टमेन्टका अनुसार एरिजोना स्टेट युनिभर्सिटीमा फल २०२५ मा ४३२ जना अनधिकृत अप्रवासी विद्यार्थीहरूले कुल १ करोड ५ लाख डलर बराबरको शुल्क छुट पाएका थिए।
यद्यपि, वासिङ्टन राज्यका गभर्नर बाब फर्गुसनले राज्यको नीतिको बचाउ गर्दै अदालतमा सामना गर्ने र जित्ने दाबी गरेका छन्।
जून २०२४ को एक प्रतिवेदन अनुसार, अमेरिकाभर करिब ४,०८,००० अनधिकृत अप्रवासीहरू उच्च शिक्षामा भर्ना भएका छन्, जसमध्ये २९.१ प्रतिशत १७ वर्ष वा सोभन्दा बढी उमेरमा अमेरिका प्रवेश गरेका थिए।