अमेरिकाद्वारा २,३०० मेक्सिकनलाई ग्वाटेमाला देशनिकाला, मेक्सिकोको कडा आपत्ति
प्रकाशित मिति : ४ भदौ २०८३, बिहिबार
Photo:Veer Mickey Shah/ Unsplash
अमेरिकी प्रशासनले आप्रवासन नीतिमा कडाइ गर्दै यसै वर्ष करिब २,३०० मेक्सिकन नागरिकलाई तेस्रो मुलुक ग्वाटेमाला देशनिकाला गरेको छ। ग्वाटेमालाका राष्ट्रपति बर्नाडो अरेभालोले एक टेलिभिजन अन्तर्वार्तामा आफ्नो देश फर्काइएका नागरिकहरूसँगै मेक्सिकनहरू पनि विमानमा आइपुगेको जानकारी दिएका छन्। उनका अनुसार ती मेक्सिकनहरूलाई २४ घण्टाभित्रै उनीहरूकै गृहदेश स्थानान्तरण गरिएको छ।
मेक्सिकोको परराष्ट्र मन्त्रालयले अमेरिकाको यस कदमको कडा विरोध गर्दै असहमति जनाएको छ। मन्त्रालयले आफ्ना नागरिकहरूलाई तेस्रो मुलुकमा देशनिकाला गर्ने अभ्यास अस्वीकार्य रहेको र आफ्ना नागरिकको सुरक्षित फिर्तीका लागि काम गरिरहेको बताएको छ।
सामान्यतया अन्तर्राष्ट्रिय नियमअनुसार देशनिकाला गरिएका व्यक्तिहरूलाई उनीहरूकै नागरिकता भएको देशमा पठाइने गरिन्छ। तर, आप्रवासीहरूलाई पुनः गैरकानुनी रूपमा अमेरिका प्रवेश गर्न कठिन बनाउने र सीमा क्षेत्रबाट टाढा धकेल्ने उद्देश्यले अमेरिकी प्रशासनले यस्तो रणनीति अपनाएको आप्रवासन विज्ञहरू बताउँछन्।
मानव अधिकारवादी संस्थाहरूका अनुसार ग्वाटेमालाका साथै केही मेक्सिकनहरूलाई होन्डुरससमेत पठाइएको छ। यो कदमले आप्रवासीहरूमाझ डर र त्रास पैदा गराउने अधिकारकर्मीहरूको आरोप छ। यता अमेरिकी विदेश मन्त्रालयले भने अवैध आप्रवासन नियन्त्रण गर्नु नै प्रशासनको शीर्ष प्राथमिकता रहेको जनाएको छ।