अमेरिकामा सवारी साधन ट्र्याकिङ नियममा परिवर्तन: फ्लक सेफ्टीले घटायो डेटा भण्डारण अवधि
प्रकाशित मिति : २८ श्रावण २०८३, बिहिबार
Photo: krzhck/ Unsplash
सर्वसाधारणका सवारी साधनको आवतजावत निगरानी गर्ने अमेरिकी प्रविधि कम्पनी फ्लक सेफ्टीले आफ्ना उत्पादन र सेवाहरूमा नयाँ सुरक्षात्मक उपायहरू लागू गर्ने घोषणा गरेको छ।
कम्पनीले जारी गरेको प्रेस विज्ञप्ति अनुसार, सर्वसाधारणको यात्रा डेटा भण्डारण गर्ने पूर्वनिर्धारित अवधि एक महिनाबाट घटाएर एक हप्ता बनाइएको छ। यदि कुनै प्रहरी अधिकारीले डेटा लामो समयसम्म राख्न चाहेमा उनीहरूले अनिवार्य रूपमा मुद्दा वा अनुसन्धान नम्बर प्रविष्ट गर्नुपर्नेछ।
प्रहरी अधिकारीहरूबाट हुन सक्ने डेटाको दुरुपयोग रोक्न कम्पनीले ‘अडिट असिस्टेन्स’नामक नयाँ प्रणाली पूर्ण रूपमा लागू गर्ने भएको छ। यो प्रणालीले अस्वाभाविक वा संशयास्पद खोजी गर्ने प्रयोगकर्ता वा अधिकारीको पहुँच स्वतः लक गरिदिनेछ।
फ्लक सेफ्टीका प्रवक्ताका अनुसार, यी परिवर्तनहरू गोपनीयतासम्बन्धी चिन्ता सम्बोधन गर्न र क्यामेराको सम्भावित दुरुपयोग रोक्न ल्याइएको हो। पछिल्लो समय अमेरिकाका विभिन्न शहरहरूमा यी क्यामेराहरूमाथि तोडफोड हुन थालेपछि केही शहरहरूले कम्पनीसँगको सम्झौता नै रद्द गरेका थिए।
तथापि, अमेरिकी नागरिक अधिकार संघले कम्पनीका यी कदमहरूलाई अत्यन्तै सामान्य सुधारको रूपमा टिप्पणी गरेको छ।
मेरो मुख्य चिन्ता अझै पनि यही हो कि उनीहरू एउटा यस्तो सामूहिक निगरानी गर्ने कम्पनी हुन्, जसले कुनै पनि गल्ती नगरेका लाखौँ सर्वसाधारणका गाडीका लाइसेन्स प्लेटहरू महिनामा अर्बौँ पटक स्क्यान गरेर डेटा संकलन गर्छन् एसिएलयु का वरिष्ठ नीति सल्लाहकार चाड मार्लोले भने।
फ्लक सेफ्टीले स्वचालित लाइसेन्स प्लेट रिडर क्यामेराहरू निर्माण गर्छ। पोलहरूमा जडान गरिएका यी क्यामेराहरूले सडकबाट गुड्ने गाडीको लाइसेन्स प्लेट नम्बर, गाडीको ब्रान्ड, मोडल, रङ र यात्रा गरेको समय स्वतः रेकर्ड गरी विशाल डेटाबेसमा भण्डारण गर्छन्।
प्रहरी प्रशासनले यी डेटा हेर्नका लागि अदालतको वारेन्ट लिनुपर्दैन। साथै, एउटा प्रहरी कार्यालयले यो डेटा स्थानीय, राज्य वा राष्ट्रिय स्तरका अन्य प्रहरी निकायहरूसँग सहजै साझा गर्न सक्छ।
प्रहरी र कम्पनीले यस प्रविधिलाई अपराधी पक्रन र अनुसन्धानको समय बचाउन अति उपयोगी माध्यम मानेका छन्। तर, गोपनीयताका अभियन्ताहरूले भने यसले निर्दोष नागरिकहरूलाई पनि निगरानीको दायरामा ल्याएको र प्रहरीबाट व्यक्तिको पछ्याउने जस्ता दुरुपयोगका घटनाहरू बढेको आरोप लगाउँदै आएका छन्।