अमेरिकामा १० वर्षदेखि जारी नक्कली विवाह गिरोहको पर्दाफास: ११ जनाविरुद्ध मुद्दा दायर
प्रकाशित मिति : २७ श्रावण २०८३, बुधबार
अमेरिकी जस्टिस डिपार्टमेन्टले बुधबार ११ जनाविरुद्ध आपराधिक मुद्दा दर्ता गर्दै एक ठूलो “अवैध विवाह गिरोह”को पर्दाफास गरेको छ। यस गिरोहले चिनियाँ नागरिक र अमेरिकी नागरिकहरू बीच १,००० भन्दा बढी “नक्कली विवाह” गराएको आरोप लगाइएको छ।
न्युयोर्कको साउदर्न डिस्ट्रिक्टमा दर्ता गरिएको २१ पृष्ठ लामो अभियोगपत्र अनुसार यो विवाह ठगी धन्दा सन् २०१६ देखि २०२६ सम्म चलेको थियो। यस योजनालाई मुख्य अभियुक्तहरू एमी चेङ, सियाओ मेई च्यान र ग्याङ झेङले सञ्चालन गरेका थिए।
पत्रकार सम्मेलनमा बोल्दै महान्यायाधिवक्ता टोड ब्लान्चले यो केसलाई अमेरिकाको इतिहासकै ठूला विवाह ठगी मुद्दाहरूमध्ये एक भनेका छन्।
यो योजना कुनै अल्पकालीन वा सामान्य अपरेसन थिएन। यो त कानुनी रूपमा अमेरिकी नागरिक बन्न अयोग्य वा नसक्ने व्यक्तिहरूलाई गैरकानुनी रूपमा मद्दत गर्न वर्षौंदेखि चलाइएको करोडौँ डलरको संगठित उद्योग थियो, ब्लान्चले भने।
अभियोगपत्रका अनुसार यी नक्कली विवाहहरू मुख्यतया चिनियाँ नागरिकहरूलाई अमेरिकाको ग्रीन कार्ड दिलाउनका लागि रचिएका थिए। अभियुक्तहरूले मुखैले प्रचार गरेर, सामाजिक सञ्जाल र विभिन्न विज्ञापनमार्फत विदेशी नागरिकहरूलाई ग्रीन कार्डका लागि नक्कली विवाह मिलाइदिने प्रलोभन देखाई ठगी धन्दा चलाएका थिए।
विदेशी नागरिकहरूले ग्रीन कार्ड आवेदनका लागि नक्कली विवाह र सहयोग बापत एजेन्टहरूलाई करिब १ लाख अमेरिकी डलरसम्म बुझाउने गरेका थिए। अर्कातिर, विवाह मिलाइदिने मध्यस्थकर्ताहरूले प्रति केस करिब ५,००० डलर कमिसन लिने गरेका थिए।
अभियोगपत्रमा नक्कली विवाह समारोहका तस्बिरहरू पनि समावेश छन्, जुन अभियुक्तहरूले अमेरिकी अध्यागमन अधिकारीहरूलाई बुझाएका थिए।
केही केसहरूमा, यी नक्कली विवाह समारोहहरू नजिकैका रेस्टुरेन्टहरूमा आयोजना गरिन्थे। जहाँ विदेशी नागरिक र अमेरिकी नागरिकहरूले परम्परागत चिनियाँ विवाहको पोसाक लगाउँथे। विवाह वास्तविक हो भन्ने देखाउनका लागि दलाल, भर्नाकर्ता, विदेशी र अमेरिकी नागरिकले आफ्ना साथीभाइ तथा परिवारलाई समेत आमन्त्रित गर्थे, अभियोगपत्रमा उल्लेख छ।
अधिकांश दलालहरू न्युयोर्कमा सक्रिय भए तापनि उनीहरूले अमेरिकाका अन्य राज्यहरू कनेक्टिकट, म्यासाचुसेट्स, पेन्सिलभेनिया, केन्टुकी, टेनेसी, जर्जिया, फ्लोरिडाका साथै भानुआटु र चीनसम्म पुगेर नक्कली विवाहको जालो फैलाएको आरोप लगाइएको छ।