युरोपका विमानस्थलमा बायोमेट्रिक प्रणालीको सास्ती: यात्रुहरू घण्टौंसम्म लाइनमा बस्न बाध्य
प्रकाशित मिति : १९ श्रावण २०८३, मंगलबार
Photo: Annie Spratt/ Unsplash
युरोपेली संघले लागू गरेको नयाँ बायोमेट्रिक सीमा नियन्त्रण प्रणालीका कारण युरोपका प्रमुख विमानस्थलहरूमा चरम अव्यवस्था सिर्जना भएको छ। गैर-युरोपेली यात्रुहरूलाई व्यवस्थित तरिकाले अभिलेखबद्ध गर्ने उद्देश्यले ल्याइएको यो प्रणाली प्राविधिक समस्या र कर्मचारीको अभावका कारण यात्रुहरूका लागि सास्ती बनेको छ।
दक्षिण अफ्रिकाबाट २३ घण्टाको यात्रा गरी ब्रसेल्स पुगेकी ३९ वर्षीया शोनिज सालीसहित हजारौँ यात्रुले यसको सामना गर्नुपरिरहेको छ। सालीका अनुसार अध्यागमन पार गर्न उनले पाँच घण्टा १५ मिनेटसम्म लाइनमा बस्नुपरेको थियो। लामो ढिलाइका कारण उनले पहिले नै बुक गरेको भाडाको गाडी गुमाउनुपर्यो र अर्को गाडीका लागि थप ७४० अमेरिकी डलर खर्चिनुपर्यो।
ब्रसेल्स मात्र नभई लिसबन, आम्सटर्डम र पेरिसका विमानस्थलहरूमा पनि उस्तै सास्ती छ। पोर्चुगलको लिसबनमा यात्रुहरू ६ घण्टासम्म लाइनमा उभिन बाध्य भएका छन् भने आम्सटर्डमको शिफोल विमानस्थलमा उडान छुट्ने दर दोब्बरले बढेको एयरलाइन्सहरूले जनाएका छन्।
युरोपेली संघको २९ देश सम्मिलित ‘सुरक्षित आवतजावत क्षेत्र’मा प्रवेश गर्ने वा बाहिरिने गैर-युरोपेली यात्रुहरूको औंठाछाप र अनुहारको डिजिटल स्क्यान लिनु अनिवार्य गरिएको छ।
तर, अधिकांश विमानस्थलहरूमा यात्रु आफैँले विवरण दर्ता गर्ने डिजिटल किओस्कहरू अझै पूर्ण रूपमा सञ्चालनमा आएका छैनन् वा परीक्षणकै क्रममा छन्। जसका कारण सीमित संख्यामा रहेका अध्यागमन अधिकारीहरूले नै म्यानुअल रूपमा सबै विवरण संकलन गर्नुपर्दा घण्टौँको जाम हुने गरेको छ।
समस्याको गम्भीरतालाई ध्यानमा राख्दै युरोपेली आयोगकी अध्यक्ष उर्सुला भोन डेर लेनले प्रणालीमा केही “प्राविधिक त्रुटिहरू” रहेको स्वीकार गरेकी छन्। अत्यधिक भीड भएका बेला बायोमेट्रिक विवरण संकलन कार्यलाई अस्थायी रूपमा रोक्न सकिने गरी नियममा छुट दिने विषयमा आयोगले छलफल गरिरहेको छ।
यसैगरी, पोर्चुगल र स्विडेनजस्ता केही देशहरूले मोबाइल एपमार्फत यात्रुहरूलाई अग्रिम विवरण बुझाउने सुविधा दिएर र थप सुरक्षाकर्मी परिचालन गरेर लाइन छोट्याउने प्रयास थालेका छन्।