अदालतको आदेश उल्लङ्घन गर्दै क्यालिफोर्नियाको अध्यागमन हिरासतमा बिरामीको स्वास्थ्यमाथि गम्भीर लापरबाही
प्रकाशित मिति : १२ श्रावण २०८३, मंगलबार
अमेरिकाको क्यालिफोर्नियास्थित सबैभन्दा ठूलो अध्यागमन हिरासत केन्द्रमा हिरासतमा रहेका व्यक्तिहरूलाई पर्याप्त स्वास्थ्य सेवा उपलब्ध नगराइएको र यसअघि अदालतले दिएको आदेशको उल्लङ्घन भएको अदालतद्वारा नियुक्त अनुगमनकर्ताले जनाएका छन्।
अदालतका अनुगमनकर्ता डा. मुथुसामी आनन्दकुमारले पेस गरेको प्रतिवेदनअनुसार उक्त केन्द्रमा निरन्तर र गुणस्तरीय स्वास्थ्य सेवा प्रदान गर्ने भरपर्दो प्रणालीको अभाव रहेको छ। यसले गर्दा त्यहाँ रहेका व्यक्तिहरू तत्काल र दीर्घकालीन रूपमा गम्भीर स्वास्थ्य जोखिममा परेका छन्।
यो प्रतिवेदन तीन दिने स्थलगत निरीक्षण, ४० जना बिरामी तथा दर्जनभन्दा बढी कर्मचारीहरूसँगको अन्तर्वार्ता, १४१ जना बिरामीको मेडिकल रेकर्ड र आइस तथा सञ्चालक कम्पनी ‘कोरसिभिक’ द्वारा उपलब्ध गराइएका हजारौँ पृष्ठका कागजातहरूको समीक्षाका आधारमा तयार पारिएको हो।
संघीय न्यायाधीशले निर्धारण गरेका पर्याप्त स्वास्थ्यकर्मी, समयमै आपतकालीन सेवा, र औषधिमा सहज पहुँच जस्ता आठवटा आवश्यक मापदण्डमध्ये उक्त हिरासत केन्द्र आठवटै क्षेत्रमा असफल देखिएको छ।
अमेरिकन सिभिल लिबर्टीज युनियनका अनुसार, कुनै अदालतद्वारा नियुक्त तटस्थ निकायले आइस हिरासत केन्द्रभित्रको समग्र स्वास्थ्य सेवाको अवस्थाबारे यसरी पूर्ण रूपमा अनुसन्धान गरेको यो पहिलो पटक हो।
डिपार्टमेन्ट अफ होमल्यान्ड सेक्युरिटीले कुनै पनि हिरासतमा रहेका व्यक्तिलाई स्वास्थ्य सेवाबाट वञ्चित नगरिएको र राष्ट्रिय हिरासत मापदण्ड पालना भए/नभएको नियमित अनुगमन भइरहेको दाबी गरेको छ।
हिरासत केन्द्र सञ्चालन गर्ने निजी कम्पनी कोरसिभिकका प्रवक्ताले प्रतिवेदनको समीक्षा भइरहेको र आफूहरूका लागि हिरासतमा रहेका व्यक्तिहरूको स्वास्थ्य र सुरक्षा सबैभन्दा महत्त्वपूर्ण विषय रहेको बताएका छन्।
डोनाल्ड ट्रम्पको कार्यकाल सुरु भएयता देशभरका आइस हिरासतमा ५० भन्दा बढी व्यक्तिको मृत्यु भइसकेको छ। मानव अधिकारवादीहरूले आइसको कदमले मानव अधिकार र कानुनी प्रक्रियाको उल्लङ्घन गरेको आरोप लगाउँदै आएका छन् भने ट्रम्प प्रशासनले यी कदमहरू आन्तरिक सुरक्षा सुदृढ गर्नका लागि भएको दाबी गर्दै आएको छ।