विमान चढ्ने क्रममा अध्यागमन एजेन्टद्वारा एक महिला नियन्त्रणमा, साउथवेस्ट एयरलाइन्स विवादमा
प्रकाशित मिति : १० श्रावण २०८३, आइतबार
Photo: Forsaken Films/ Unsplash
अमेरिकाको कोलोराडोस्थित विमानस्थलमा साउथवेस्ट एयरलाइन्सको जहाज चढ्न लागिसकेकी एक महिलालाई आइसका अधिकारीहरूले नियन्त्रणमा लिएको भिडियो भाइरल भएपछि डलास-आधारित उक्त विमानसेवा कम्पनीले तीव्र जनआक्रोशको सामना गरिरहेको छ।
विमान चढ्ने गेटमै सान्टाल रोजास नामकी महिलालाई नियन्त्रणमा लिइएको दृश्य सामाजिक सञ्जालमा १० लाखभन्दा बढी पटक हेरिसकिएको छ। भिडियो खिच्ने अलिसा डान्ट्स्करले भनिन्, मैले आएका प्रतिक्रियाहरू हेरेर साध्य नै भएन। गैरकानुनी रूपमा हिरासतमा लिइएकी सान्टालले पाउनुपर्ने ध्यान यस भिडियोले तानेको छ भन्ने मलाई लाग्छ।
उक्त भिडियो सार्वजनिक भएपछि धेरै यात्रुहरूले साउथवेस्ट एयरलाइन्सका आगामी उडानहरू रद्द गर्ने र एयरलाइन्सलाई बहिष्कार गर्ने चेतावनी दिएका छन्।
यस गिरफ्तारीबारे प्रश्न उठेपछि साउथवेस्ट एयरलाइन्सले एक विज्ञप्ति जारी गर्दै ‘यात्रुहरूको जानकारी यातायात सुरक्षा प्रशासन र डिपार्टमेन्ट अफ होमल्यान्ड सेक्युरिटीसँग पहिले नै उपलब्ध हुने’ स्पष्ट पारेको छ। एयरलाइन्सले आफूले राज्य तथा संघीय कानुनको पूर्ण पालना गरेको बताएको छ।
होमल्यान्ड सेक्युरिटीले रोजास इक्वेडरकी नागरिक भएको र सन् २०२५ जनवरीमा म्याद सकिएको भिसामा अमेरिकामा बसेको दाबी गरेको छ। तर, उनका वकिलले भने भिसाको म्याद सकिनुअघि नै आवश्यक कागजात दर्ता गराइएको र अध्यागमन मुद्दा विचाराधीन रहेकाले उनी कानुनी अनुमतिसहित नै अमेरिकामा रहँदै आएको बताएका छन्।
उनी सन् २०२३ मा जे-१ भिसामा आफ्ना एक नजिकका साथीको बालबच्चा हेर्ने सुसारेको रूपमा आएकी थिइन्, डान्ट्स्करले थपिन्, उनी एकदमै हिम्मतवाली छिन् र आफू सुरक्षित रहेको सन्देश पठाएकी छिन्। विश्व र देशका मानिसहरूले यसप्रति ध्यान दिइरहेका छन् र घटनाबाट स्तब्ध भएका छन्, जसमा म आभारी छु।
यसैबीच रोजासका साथै गत जुलाई १४ मा न्यासभिल अन्तर्राष्ट्रिय विमानस्थलबाट पक्राउ परेका साउथवेस्टकै उडान परिचारक लोरेन्जो थम्पसनका लागि पनि आर्थिक सहयोग जुटाउने अभियान सुरु भएको छ। जमाइकाका नागरिक थम्पसन सन् २०२१ मा ६ महिनाको भिसामा अमेरिका प्रवेश गरेको र भिसा सकिएपछि पनि बसिरहेको अध्यागमन एजेन्सीको दाबी छ।
साझा दैनिक जीवनबाटै मानिसहरूलाई अपहरण गरेजसरी त्रसित बनाएर पक्राउ गरिएको दृश्यले सबैको ध्यान तानेको डान्ट्स्करको भनाइ छ। भाइरल भिडियोले रोजासको अध्यागमन मुद्दा अघि बढ्दै गर्दा उनलाई निरन्तर सहयोग पुर्याउने अपेक्षा गरिएको छ।
साउथवेस्ट एयरलाइन्ससँग यस विषयमा पछिल्लो सामाजिक सञ्जालको प्रतिक्रियाबारे बुझ्न खोज्दा कुनै जवाफ प्राप्त नभएको जनाइएको छ।