विश्वकप फुटबल: उपाधि नजिक पुग्न फ्रान्स र स्पेन भिड्दै
प्रकाशित मिति : ३० असार २०८३, मंगलबार
फोटो :एपी/रासस
फिफा विश्वकपको सेमिफाइनल खेलहरू सुरु हुँदैछन्। यसै क्रममा उपाधिबाट मात्र दुई जित टाढा रहेका युरोपका दुई फुटबल महाशक्ति स्पेन र फ्रान्स पहिलो सेमिफाइनलमा आमनेसामने हुन लागेका हुन्।
अमेरिकाको टेक्सासमा हुने यो खेल नेपाली समय अनुसार बुधबार बिहान पौने १ बजे तथा स्थानीय समय अनुसार १४ जुलाई दिउँसो ३ बजे सुरु हुनेछ। यो बहुप्रतीक्षित भिडन्तलाई विश्व फुटबलका धेरै विश्लेषकहरूले ‘फाइनल अघिको फाइनल’ को संज्ञा दिएका छन्।
एकातिर लगातार तेस्रोपटक विश्वकपको फाइनल पुग्ने लक्ष्य बोकेको फ्रान्स छ भने अर्कोतर्फ सन् २०१० पछि पहिलोपटक विश्वकपको उपाधि जित्ने अभियानमा स्पेन रहेको छ। फरक शैली, फरक रणनीति र विश्वस्तरीय खेलाडीहरूले भरिएका यी दुई टोलीबीचको प्रतिस्पर्धाले विश्वभरका फुटबल समर्थकहरूको ध्यान तानेको छ।
फ्रान्सेली कप्तान किलियन एमबाप्पे प्रतियोगितामा आठ गोल गर्दै गोल्डेन बुटको दौडमा अग्रस्थानमा छन्। उनलाई ओस्मान डेम्बेले, माइकल ओलिसे र डिजिरे डुएजस्ता खेलाडीहरूले बलियो साथ दिँदै विपक्षी रक्षा पङ्क्तिलाई निरन्तर दबाबमा राख्दै आएका छन्।
फ्रान्सको सबैभन्दा ठूलो सबल पक्ष व्यक्तिगत क्षमताले भरिएका स्टार खेलाडीहरू हुन्, जो जुनसुकै क्षण खेलको परिणाम बदल्ने सामर्थ्य राख्छन्। यही कारण फ्रान्सलाई यस विश्वकपको सबैभन्दा खतरनाक आक्रामक टोलीमध्ये एक मानिएको छ।
यता युरोपियन च्याम्पियन स्पेनले भने आफ्नो परम्परागत बल नियन्त्रण (पोजेसन) मा आधारित शैलीलाई यस विश्वकपमा पनि निरन्तरता दिएको छ। स्पेनको मिडफिल्डमा रोड्री, पेड्री र फाबियन रुइजको त्रयीले खेलको गति नियन्त्रण गरिरहेका छन्। युवा स्टार लामिन यामालले दायाँ विङबाट सिर्जना गर्ने अवसर र मिकेल ओयारजाबालको फिनिसिङ स्पेनका मुख्य हतियार हुन्।
जहाँ फ्रान्स व्यक्तिगत प्रतिभामा बढी निर्भर देखिन्छ, त्यहाँ स्पेन सामूहिक प्रदर्शनका आधारमा सफलता खोजिरहेको छ। त्यसैले यो खेल दुई फरक फुटबल दर्शनबीचको रोचक टक्कर पनि हो।
स्पेनका लागि सबैभन्दा ठूलो चुनौती एमबाप्पेलाई रोक्नु हुनेछ। प्रतियोगिताभर उत्कृष्ट लयमा रहेका फ्रान्सेली कप्तानलाई बाँध्न सके स्पेनको फाइनल यात्रा सहज बन्न सक्छ।
स्पेनले यस विश्वकपमा उत्कृष्ट रक्षात्मक खेल प्रदर्शन गर्दै क्वाटरफाइनलसम्म केवल एक गोल मात्र बेहोरेको छ। बेल्जियमविरुद्धको खेलमा मात्र पहिलोपटक गोल खाएको स्पेनले आफ्नो बल नियन्त्रण र संगठित रक्षापङ्क्तिका कारण विपक्षीलाई धेरै अवसर सिर्जना गर्न दिएको छैन।
पछिल्ला केही वर्षको इतिहासले स्पेनलाई थप आत्मविश्वास दिएको छ। यूईएफए नेसन्स लिगमा स्पेनले फ्रान्सलाई ५–४ ले पराजित गरेको थियो भने युरो २०२४ को सेमिफाइनलमा पनि २–१ ले हराएको थियो।
यद्यपि, विश्वकप इतिहासमा भने फ्रान्सको पल्ला भारी छ। दुवै टोली विश्वकपमा दोस्रोपटक मात्र आमनेसामने हुन लागेका हुन्। यसअघि सन् २००६ को अन्तिम १६ मा भएको भेटमा स्पेनले सुरुवाती अग्रता लिए पनि फ्रान्सले उत्कृष्ट पुनरागमन गर्दै ३–१ को जित निकालेको थियो। हालसम्म यी दुई टोलीबीच भएका ३८ खेलमध्ये स्पेनले १८ खेल जितेको छ भने फ्रान्स १३ खेलमा विजयी भएको छ। बाँकी ७ खेल बराबरीमा टुंगिएका छन्।
विश्लेषकहरूका अनुसार यस खेलको भाग्य मिडफिल्डले निर्धारण गर्नेछ। फ्रान्सले तीव्र गतिको काउन्टर अट्याकमा जोड दिने सम्भावना छ भने स्पेनले रोड्री, पेड्री र फाबियन रुइजामार्फत बल नियन्त्रणमा राखेर खेलको गति आफ्नो हातमा लिन खोज्नेछ।
एमबाप्पेको जादुमयी गति र स्पेनको संगठित सामूहिक खेलबीचको यो प्रतिस्पर्धा केवल फाइनल यात्राको लडाइँ मात्र नभई, आधुनिक फुटबलका दुई भिन्न दर्शनबीचको प्रतिष्ठाको लडाइँ पनि हो।