२ मंसिर २०८३, बुधबार| Wednesday, November 18, 2026
अध्यागमन

टेनेसीमा नयाँ कानुन लागू हुँदै: अध्यागमन, शिक्षा र आत्मरक्षामा कडा व्यवस्था

brown wooden tool on white surface

फोटो : टिन्गी इन्जुरी ल फर्म

अमेरिकाको टेनेसीमा आगामी जुलाई १ देखि विभिन्न महत्वपूर्ण नयाँ कानुनहरू लागू हुने भएका छन्। टेनेसीको ११४ औं साधारण सभा द्वारा पारित यी विधेयकहरूले विशेष गरी अध्यागमन नियन्त्रण, विद्यालयको पाठ्यक्रम, सम्पत्तिको सुरक्षा र आकस्मिक स्वास्थ्य सेवा जस्ता क्षेत्रमा व्यापक परिवर्तन ल्याउनेछन्।

नयाँ व्यवस्था अनुसार अब राज्यका सबै सरकारी निकाय, स्थानीय प्रशासन र स्वास्थ्य विभागहरूले सार्वजनिक सेवा तथा सुविधाका लागि आवेदन दिने व्यक्तिहरूको कडा अभिलेख राख्नुपर्नेछ, जसमा अमेरिकी नागरिकता वा वैध बसाईको प्रमाणिकरण अनिवार्य गरिएको छ।

अमेरिकामा गैरकानुनी रूपमा बसोबास गरिरहेका व्यक्तिहरूले पाइरहेका सरकारी सुविधाहरू तत्कालै कटौती गरिनेछन् भने नयाँ आवेदकहरूले नागरिकता प्रमाणित गर्न नसकेमा उनीहरू सरकारी सुविधाका लागि सर्वथा अयोग्य ठहरिनेछन्। यस नियमको पालना नगर्ने वा विवरण लुकाउने सरकारी कर्मचारीहरूलाई कडा सजायको व्यवस्था गरिएको छ, जसमा एक वर्षसम्मको जेल सजाय र २,५०० अमेरिकी डलरसम्म जरिवाना हुन सक्नेछ।

शिक्षा क्षेत्रतर्फ विद्यालयहरूका लागि दुईवटा महत्वपूर्ण कानुन जारी गरिएका छन्। पहिलो, ‘चार्ली कर्क अमेरिकन हेरिटेज एक्ट’ अन्तर्गत अब टेनेसीका सबै सरकारी र चार्टर विद्यालयहरूमा अमेरिकी इतिहासको निर्माणमा धर्मले खेलेको भूमिकाबारे पढाउनु अनिवार्य हुनेछ।

यस पाठ्यक्रममा प्रारम्भिक धार्मिक यात्री, अमेरिकी स्वतन्त्रताको घोषणापत्र, नागरिक अधिकार आन्दोलनमा धर्मको प्रभाव र अमेरिकी कानुनी प्रणालीको जग बसाल्न ‘१० आदेश’ ले पुर्‍याएको योगदान समावेश गरिनेछ। दोस्रो व्यवस्था अनुसार, बालवाडी देखि कक्षा १२ सम्मका सबै विद्यार्थीहरूका लागि बाल बेचबिखन सम्बन्धी सचेतना कक्षा अनिवार्य गरिएको छ।

यो विषय प्रभावकारी रूपमा पढाउन विद्यालयहरूले स्वास्थ्यकर्मी वा सामाजिक कार्यकर्ताहरूको प्रत्यक्ष सहयोग लिन सक्नेछन् र प्रत्येक विद्यालय क्षेत्रले यसको विस्तृत कार्ययोजना राज्य सरकार समक्ष पेस गर्नुका साथै सार्वजनिक रूपमा प्रकाशन गर्नुपर्नेछ।

सम्पत्ति र आत्मरक्षाको सवालमा पनि सरकारले नागरिकहरूलाई थप शक्तिशाली कानुनी अधिकार प्रदान गरेको छ। नयाँ कानुन अनुसार यदि कसैले कसैको घरमा जबर्जस्ती घुसपैठ गरेमा, चोरी वा तोडफोड गरेमा, अथवा घरपालुवा जनावरलाई हानि पुर्‍याउन खोजेमा घरधनीले आफ्नो रक्षाका लागि ‘घातक बल’  प्रयोग गर्न पाउनेछन्।

यद्यपि, यस कानुनमा एउटा कडा प्रतिबन्ध पनि लगाइएको छ-यदि शंकास्पद अपराधीको ढाड घरधनीतिर फर्किएको छ, अर्थात् ऊ भागिरहेको छ वा आक्रमण गर्ने स्थितिमा छैन भने उसमाथि ज्यान लिने उद्देश्यले बल प्रयोग गर्न पाइने छैन।

खसोखासका समाचार नछुटाउनुहोस्Follow Khasokhas for immigration, green card, tax and community news.Facebook मा Follow गर्नुहोस् →

स्वास्थ्य सेवाको क्षेत्रमा पारित नयाँ विधेयकले विशेष गरी गर्भवती महिलाहरूलाई ठूलो कानुनी संरक्षण दिएको छ। अबदेखि टेनेसीका अस्पतालहरूले कुनै पनि गर्भवती महिला आपतकालीन अवस्थामा आएमा उनको बीमा  वा आर्थिक हैसियत जे-जस्तो भए पनि अनिवार्य रूपमा स्वास्थ्य परीक्षण र उपचार सेवा उपलब्ध गराउनुपर्नेछ।

कुनै पनि अस्थिर अवस्थाकी गर्भवती बिरामीलाई उनको आफ्नै लिखित अनुरोध वा सम्बन्धित चिकित्सकको प्रमाणित अनुमति विना अर्को अस्पतालमा स्थानान्तरण गर्न पाइने छैन। यदि कुनै अस्पतालले यो मानवीय नियम उल्लंघन गरेमा ५०,००० डलरसम्म जरिवाना भोग्नुपर्नेछ भने लापरवाही गर्ने डाक्टरको मेडिकल लाइसेन्स समेत खारेज हुन सक्ने कडा कानुनी प्रावधान राखिएको छ।

लेखक रमेश फुल्लेल

रमेश फुल्लेलले खसोखासका लागि समसामयिक विषयमा रिपोर्टिङ गर्छन्। नेपालका अनलाइन सञ्चारमाध्यममा रिपोर्टिङको अनुभव बटुलेका उनले राजनीति, अध्यागमन लगायतका विषयमा समाचार लेख्दै आएका छन्। साथै, उनले स्थानीय जनसरोकारका विषयमा समेत रिपोर्टिङ र विश्लेषण प्रस्तुत गर्दै आएका छन्।

यस लेखकका थप समाचार →