३ मंसिर २०८३, बिहिबार| Thursday, November 19, 2026
अन्तर्राष्ट्रिय

युरोप  पुग्ने प्रयासमा पछिल्लो पाँच महिनामा १३ सय बढी आप्रवासीको मृत्यु

Photo: Ilia/Unsplash

अफ्रिकाबाट एटलान्टिक महासागर र पश्चिमी भूमध्यसागरको जोखिमपूर्ण मार्ग हुँदै युरोप छिर्न खोज्ने आप्रवासीहरूको अनुगमन गरिरहेको एक अधिकारवादी संस्थाका अनुसार सन् २०२६ को पहिलो पाँच महिनामा मात्रै १,३०० भन्दा बढी आप्रवासीको मृत्यु भएको छ।

आप्रवासीको क्षेत्रमा कार्यरत संस्था वाकिङ बोर्डर्सले बुधबार यो प्रतिवेदन सार्वजनिक गरेको हो। पोप लियोको क्यानरी टापु भ्रमणको पूर्वसन्ध्यामा यो प्रतिवेदन आएको हो। स्पेनको उक्त टापु समूहमा विगत एक दशकयता अवैध आप्रवासीहरूको आगमनमा निकै ठूलो वृद्धि भएको देखिन्छ।

प्रतिवेदन अनुसार सन् २०२६ को सुरुवाती पाँच महिनामा १४२ महिला र १२९ बालबालिकासहित जम्मा १,३१७ जनाले स्पेनको तट पुग्ने क्रममा ज्यान गुमाएका छन्। यसमा सवार यात्रुसहित पूर्ण रूपमा बेपत्ता भएका २७ वटा डुङ्गाहरू समेत सामेल छन्।

यसै हप्ता स्पेनको भ्रमणमा रहेका पोप लियोले आप्रवासीहरूमाथि भइरहेको व्यवहारप्रति चासो देखाउँदै उनीहरूको दुर्दशा वर्तमान अन्तर्राष्ट्रिय व्यवस्थाको नैतिक धरातलका लागि ठूलो चुनौती भएको बताएका छन्।

अधिकारवादीहरूका अनुसार युरोपको नजिक मानिने माउरिटानिया जस्ता देशहरूले निगरानी र नियन्त्रणमा कडाइ गरेपछि आप्रवासीहरूले पक्राउ हुनबाट जोगिन एटलान्टिक महासागरको अझ लामो र खतरनाक मार्ग रोज्न थालेका छन्।

यसअघि सन् २०२५ मा पनि स्पेन पुग्ने प्रयास गर्दा ३,०९० जनाले ज्यान गुमाएका वा बेपत्ता भएका सोही संस्थाको तथ्याङ्क छ।

क्यानरी टापु र पश्चिम अफ्रिकी तटबीचको सबैभन्दा छोटो दूरी झन्डै १०० किलोमिटर रहेको छ। यसबाहेक आप्रवासीहरूले मोरक्कोबाट स्पेन जोडिने अर्को २० किलोमिटर चौडा समुद्री मार्ग समेत पौडिएर वा ससाना डुङ्गामार्फत पार गर्ने प्रयास गर्ने गर्छन्।

लेखक रमेश फुल्लेल

रमेश फुल्लेलले खसोखासका लागि समसामयिक विषयमा रिपोर्टिङ गर्छन्। नेपालका अनलाइन सञ्चारमाध्यममा रिपोर्टिङको अनुभव बटुलेका उनले राजनीति, अध्यागमन लगायतका विषयमा समाचार लेख्दै आएका छन्। साथै, उनले स्थानीय जनसरोकारका विषयमा समेत रिपोर्टिङ र विश्लेषण प्रस्तुत गर्दै आएका छन्।

यस लेखकका थप समाचार →