विवादका बीच अमेरिकी सिनेटबाट ७० अर्ब डलरको आप्रवासन बजेट विधेयक पारित
प्रकाशित मिति : २२ जेष्ठ २०८३, शुक्रबार
तस्बिर: जुलिया डेमरी निकिनसन एपी \रासस
अमेरिकी सिनेटले शुक्रबार बिहान सबेरै राष्ट्रपति डोनाल्ड ट्रम्पका आप्रवासन प्रवर्तन निकायहरूलाई बजेट उपलब्ध गराउने एउटा महत्त्वपूर्ण विधेयक पारित गरेको छ। यसअघि १.८ अर्ब डलरको “एन्टी-वेपनाइजेसन”कोषलाई लिएर तीव्र द्विपक्षीय विरोध भएपछि यो विधेयक नै संकटमा परेको थियो।
हप्तौँको ढिलाइपछि रिपब्लिकनहरूले ७० अर्ब डलरको यो विधेयक सिनेटबाट ५२-४७ मतले पारित गराउन सफल भएका हुन्। यस विधेयकले ट्रम्पको कार्यकालको अन्त्यसम्मका लागि आइस र सीमा बोर्डर पेट्रोललाई बजेट उपलब्ध गराउनेछ।
अलास्काकी रिपब्लिकन सिनेटर लिसा मुर्कोव्स्कीले मात्र आफ्नै पार्टीको निर्णयविरुद्ध मतदान गरेकी थिइन् भने सबै डेमोक्र्याटहरूले यसको विपक्षमा मत हालेका थिए। कोलोराडोका डेमोक्र्याटिक सिनेटर माइकल बेनेट भने मतदानमा अनुपस्थित थिए।
सिनेटर मुर्कोव्स्कीले बजेट रिकन्सिलेसन प्रोसेसको आलोचना गरिन्। यो प्रक्रियाले साधारण बहुमत बाटै कर र खर्चसम्बन्धी विधेयकहरू पारित गर्न अनुमति दिन्छ, जसले गर्दा विपक्षीको अवरोध हटाउन आवश्यक पर्ने ६० मतको बाध्यता रहँदैन।
मुर्कोव्स्कीले भनिन्, आइस र सीबीपीलाई बजेट दिनु आवश्यक थियो भन्ने कुरामा म दृढ छु। तर नियमित प्रक्रिया र विनियोजन प्रणालीलाई पूर्ण रूपमा बाइपास गरेर साढे तीन वर्षका लागि बजेट दिनु मलाई उचित लागेन। यसले एजेन्सीहरूलाई कोष दिने हाम्रो स्थापित प्रणालीलाई मिचेको छ।
उनले ट्रम्प प्रशासनद्वारा ल्याइएको “एन्टी-वेपनाइजेसन” कोष प्रति पनि आपत्ति जनाइन्। यो कोष संघीय सरकारद्वारा लक्षित भएको आरोप लगाउने अमेरिकीहरूलाई भुक्तानी गर्नका लागि प्रस्ताव गरिएको एउटा सम्झौता कोष हो। राष्ट्रपतिको कर विवरण चुहावट भएको विषयमा ट्रम्पले आन्तरिक राजस्व सेवा विरुद्ध दायर गरेको मुद्दाको सम्झौताको रूपमा यो कोष सिर्जना गरिएको थियो।
यस विधेयकमा आइसका लागि ३८.६ अर्ब डलर, सीमा गस्तीका लागि २२.६ अर्ब डलर, डीएचएसका लागि ५ अर्ब डलर र बाल शोषण अनुसन्धानका लागि १० करोड ८५ लाख डलर विनियोजन गरिएको छ।
यस विधेयकमा ह्वाइट हाउसको बलरुमको सुरक्षाका लागि कुनै बजेट व्यवस्था गरिएको छैन। साथै, डेमोक्र्याट र केही रिपब्लिकनहरूले जनवरी ६ का प्रदर्शनकारी र ट्रम्पका सहयोगीहरूलाई सरकारी रकम बाँड्नका लागि प्रयोग हुन सक्ने अनियमित कोषका रूपमा हेरेको यो रकममा कुनै कानुनी अङ्कुश पनि राखिएको छैन।
बिहान करिब ५ बजे भएको अन्तिम मतदानअघि १८ घण्टा लामो संशोधन प्रस्तावहरूमाथि लगातार मतदान हुने प्रक्रिया चलेको थियो। यस क्रममा सिनेटरहरूले २९ वटा संशोधन र प्रस्तावहरू पेस गरेका थिए। केही रिपब्लिकनहरूले ट्रम्पको प्राथमिकता भन्दा फरक रहेका संशोधनहरूको समेत समर्थन गरेका थिए।
अन्ततः रिपब्लिकनहरूले सो सेटलमेन्ट कोषलाई खारेज गर्ने वा परिवर्तन गर्ने दुवै पक्षका सिनेटरहरूको प्रयासलाई असफल तुल्याइदिए। जनवरी ६ मा सुरक्षाकर्मीमाथि आक्रमण गर्ने अभियोगमा दोषी ठहरिएकाहरूलाई यो कोषबाट रकम दिन नपाइने भनी ल्याइएको एउटा संशोधनको पक्षमा आठ जना रिपब्लिकनले मतदान गरे पनि आवश्यक ६० मत नपुग्दा सो संशोधन विफल भयो।
कोषमा कुनै प्रतिबन्ध नलगाइएको बारे सोधिएको प्रश्नमा सिनेटका बहुमत पक्षका नेता जन थुनले अटोर्नी जनरल टोड ब्लान्चले प्रशासनले यो कोषलाई अगाडि नबढाउने जानकारी गराइसकेको बताए। मेरो विचारमा, जुन कुराको चर्चा गरियो र पछि हटाइयो, त्यो अब टुङ्गिसकेको विषय हो, थुनले भने।