२ मंसिर २०८३, बुधबार| Wednesday, November 18, 2026
अन्तर्राष्ट्रिय

अमेरिकी गायिकामाथि आक्रमणको योजना बनाउनेलाई १५ वर्ष जेल सजाय

अमेरिकी गायिकालाई आक्रमण गर्ने योजना बनाएका एक युवकलाई अस्ट्रियाको अदालतले १५ वर्ष जेल सजाय सुनाएको छ।

सन् २०२४ मा राजधानी भियनामा आयोजित अमेरिकी गायिका टेलर स्विफ्टको कन्सर्टमा इस्लामवादी आक्रमणको योजना बनाएको आरोपमा ती युवकलाई जेल सजाय सुनाइएको हो। ती युवकले आफ्नो आरोप स्वीकार गरेका छन्। अदालतले उनलाई मुख्यतः आतंकवादसम्बन्धी विभिन्न अभियोगमा दोषी ठहर गरेको हो।

अस्ट्रियाली गोपनीयता नियमअनुसार पूरा नाम सार्वजनिक नगरिएका ‘बेरान ए’ नामका ती युवकलाई सन् २०२४ अगस्ट ७ मा पक्राउ गरिएको थियो। उनलाई टेलर स्विफ्टको तीनदिने कार्यक्रम सुरु हुनुभन्दा एक दिनअघि नियन्त्रणमा लिइएको थियो।

त्यसपछि अमेरिकी पप गायिका टेलर स्विफ्टको भियनामा तय भएका तीनवटै कन्सर्ट रद्द गरिएका थिए। उक्त निर्णयले प्रशंसकहरू निराश बनेका थिए भने स्विफ्टले पनि त्यसलाई “विनाशकारी” घटना भनेकी थिइन्।

त्यतिबेला निराश भएका प्रशंसकहरूले भियनामा एकसाथ गीत गाएर आफूलाई सान्त्वना दिएका थे। तर अदालतको सुनुवाइका क्रममा न त स्विफ्ट उपस्थित भइन्, न त उनका प्रशंसकहरू “स्विफ्टीज” नै अदालत पुगे।

अस्ट्रियाली नागरिक बेरान एले योजनाबद्ध आक्रमणसँग सम्बन्धित अभियोग स्वीकार गरेका थिए। ती अभियोगमा अधिकतम २० वर्षसम्म जेल सजाय हुन सक्थ्यो। अदालत प्रवेश गर्दा उनले तस्बिरमा चिनिन नदिन आफ्नो अनुहार फाइलले छोपेका थिए।

अदालतका अनुसार उनले मेसिन गन र हाते ग्रिनेडसहितका हतियार अवैध रूपमा खरिद गर्ने प्रयास गरेका थिए, तर उनी सफल हुन भने सकेनन्।

उनले इस्लामिक स्टेट समूहको “तिम्री आमाको भान्सामा बम बनाऊ” शीर्षकको भिडियो हेरेर ‘ट्राइएसिटोन ट्राइपेरअक्साइड’ अर्थात् ‘टीएटीपी’ नामक विस्फोटक पदार्थ पनि सानो परिमाणमा तयार गरेका थिए।

खसोखासका समाचार नछुटाउनुहोस्Follow Khasokhas for immigration, green card, tax and community news.Facebook मा Follow गर्नुहोस् →

अदालतमा प्रस्तुत अभियोगअनुसार उनले आफ्ना दुई विद्यालयका साथीहरूसँग मिलेर सन् २०२४ को सुरुआतमा मध्यपूर्वका छुट्टाछुट्टै सहरमा एकल आक्रमण गर्ने योजना पनि बनाएका थिए।

बेरान ए र अर्का अभियुक्त ‘आर्डा के’ ले आफूहरू क्रमशः दुबई र इस्तानबुल पुगेको स्वीकार गरेका थिए। उनीहरूले त्यहाँ आक्रमण गर्ने उद्देश्य राखे पनि अन्ततः योजना कार्यान्वयन नगरेको बताएका थिए।