एफबीआईको खोजीमा मोनिका: पक्राउ गराउनेलाई २ लाख डलर पुरस्कार, इरानमा बसेर जासुसी गरेको आरोप
प्रकाशित मिति : ३१ बैशाख २०८३, बिहिबार
अमेरिकी वायुसेनाका पूर्व गुप्तचर विशेषज्ञलाई पक्राउ गर्न सूचना दिने व्यक्तिलाई २ लाख डलर पुरस्कार दिइने भएको छ।
अमेरिकाको संघीय अनुसन्धान ब्युरो (एफबीआई) ले इरानका लागि गुप्तचरी गरेको आरोप लागेकी पूर्व अमेरिकी वायुसेना गुप्तचर विशेषज्ञ मोनिका विटलाई पक्राउ गर्न सहयोग पुग्ने सूचना दिने व्यक्तिलाई दुई लाख अमेरिकी डलर पुरस्कार दिने घोषणा गरेको हो।
सार्वजनिक गरिएको सूचनामा संघीय अनुसन्धान ब्युरोले सन् २०१३ मा इरानतर्फ भागेकी भनी अनुमान गरिएकी मोनिका विटको खोजी अझै जारी रहेको जनाएको छ। ब्युरोका अनुसार उनले सम्भवतः अझै पनि इरानमा रहेर अमेरिका विरोधी गतिविधिमा सहयोग गरिरहेकी छन्।
वाशिङ्टनस्थित संघीय अनुसन्धान ब्युरोको प्रतिगुप्तचर तथा साइबर विभागका विशेष एजेन्ट ड्यानियल विर्ज्बिकीले भने, “संघीय अनुसन्धान ब्युरोले यो मुद्दा बिर्सिएको छैन। इरानको इतिहासको यो संवेदनशील समयमा कसैसँग उनको अवस्थाबारे जानकारी हुन सक्छ भन्ने हाम्रो विश्वास छ।” उनले अमेरिका र इरानबीच जारी तनावतर्फ संकेत गरेका थिए।
संघीय अनुसन्धान ब्युरोले सर्वसाधारणसँग विटबारे कुनै पनि जानकारी भए उपलब्ध गराउन आग्रह गर्दै उनलाई कानुनी दायरामा ल्याउन सहयोग गर्न अपिल गरेको छ।
मोनिका विट अमेरिकी वायुसेनाको विशेष अनुसन्धान कार्यालयमा प्रतिगुप्तचर अधिकारीका रूपमा कार्यरत थिइन्। सन् २००३ देखि २००८ सम्म उनले मध्यपूर्व क्षेत्रमा गुप्तचरसम्बन्धी जिम्मेवारी सम्हालेकी थिइन्।
सन् २०१९ मा तत्कालीन सहायक महान्यायाधिवक्ताले विटलाई इरानले लक्षित गरी भर्ती गरेको आरोप लगाएका थिए। उनका अनुसार इरान पुगेपछि विटले अत्यन्त गोप्य गुप्तचर सङ्कलन कार्यक्रमसम्बन्धी जानकारी तथा अमेरिकी गुप्तचर अधिकारीको पहिचान इरानलाई उपलब्ध गराएकी थिइन्। यो सूचनाले ती अधिकारीको जीवन नै जोखिममा परेको थियो।
अभियोगपत्रअनुसार सन् २०१२ जनवरीदेखि २०१५ मेसम्म विटले इरान तथा अमेरिका बाहिरका अन्य स्थानमा इरानी व्यक्तिहरूसँग मिलेर अमेरिकी राष्ट्रिय सुरक्षासम्बन्धी कागजात तथा जानकारी इरानलाई उपलब्ध गराउने षड्यन्त्र गरेकी थिइन्।
अभियोजन पक्षले ती जानकारी अमेरिकाको हितविपरीत र इरानको फाइदाका लागि प्रयोग गर्ने उद्देश्य रहेको दाबी गरेको छ।
इरान पुगेपछि उनलाई इरानी सरकारी अधिकारीहरूले बसोबास, कम्प्युटर उपकरणलगायत सुविधा उपलब्ध गराएको अभियोगपत्रमा उल्लेख छ।